ქედის მუნიციპალიტეტის სოფელ მახუნცეთში განთავსებული მონუმენტი – „სამშობლოს სადარაჯოზე“ დაზიანებულია. მონუმენტის ნაწილი სპილენძის გარსისგან მთლიანად გაძარცვულია.
როგორც ქედის მერი, როლანდ ბერიძე „ბათუმელებთან“ საუბარში ამბობს, რამდენიმე დღის წინ სავარაუდოდ ქურდობის ფაქტი მოხდა, რაზეც „დაწყებულია გამოძიება ქურდობის მუხლით“.
კითხვაზე, როდისთვის აპირებს მერია მონუმენტის აღდგენას, როლანდ ბერიძემ გვიპასუხა, რომ ჯერ გამოძიებას დაელოდებიან: „ვნახოთ, როგორ იქნება და რა იქნება.“
ასე გამოიყურება მონუმენტი „სამშობლოს სადარაჯოზე“ მახუნცეთში/ფოტო: გენო თებიძე
მონუმენტი 2018 წელს საინიციატივო ჯგუფმა – ბერიძეების საგვარეულომ დაამზადებინა მოქანდაკეებს დავით ბოლქვაძეს და ავთანდილ ნავროზაშვილს.
პროექტის ავტორი მხატვარ დეკორატორი ალექსანდრე ლანევსკია, ხოლო არქიტექტორი – დავით სვანიძე. როგორც მაშინ ითქვა, მონუმენტი საქართველოს დემოკრატიული რესპუბლიკის დაარსებიდან ასი წლისთავს მიუძღვნეს.
მონუმენტის ესკიზი
