მთიანი აჭარა

სხდომაა თუ დომხალი? – რეპორტაჟი ხელვაჩაურის საკრებულოს სხდომიდან

19.12.2012 • 2279
სხდომაა თუ დომხალი?  –  რეპორტაჟი ხელვაჩაურის საკრებულოს სხდომიდან

ფრაქცია, რომლისთვისაც მანქანის შესაძენად ხელვაჩაურის მუნიციპალიტეტის საკრებულომ 15 000 ლარი გაითვალისწინა, ექვსი ყოფილი „ნაციონალისგან“ შედგება, მათ პარტია არჩევნებიდან მცირე დროის შემდეგ დატოვეს და როგორც დამოუკიდებელმა დეპუტატებმა ხათუნა ნარიმანიძის ხელმძღვანელობით ახალი ფრაქცია შექმნეს.   ამ ფრაქციისთვის მანქანის შეძენის ინიციატივა „იმ ფონზე, როცა ქვეყანაში ამდენი უსახლკარო და გაჭირვებულია“ კიდევ ერთი ფრაქციის წევრმა სულიკო მიქელაძემ გააკრიტიკა და კოლეგებს „საკითხის ჩაგდებისკენ“ მოუწოდა. მან მისი ფრაციის ხელმძღვანელს კობა ბექტაშვილს თანხის დაზოგვის მიზნით ხათუნა ნარიმანიძისთვის მათივე ფრაქციისთვის გამოყოფილი მანქანის გადაცემა სთხოვა.  

 

 

760 769 ლარით გაზრდილი და სახეცვლილი ბიუჯეტი საკრებულოს წევრებს თავმჯდომარემ, მალხაზ ფარტენაძემ წარუდგინა.  გამგეობის საფინანსო სამსახურის ხელმძღვანელის ტარიელ ნაკაშიძის განმარტებით  დამატებითი თანხებიდან ახალი მანქანის გარდა თანხა სახანძრო სამაშველო სამსახურისთვის ახალი მანქანის შესაძენად, სპორტული ღონიძიებების დაფინანსებითვის, მაჭახლის ხეობისთვის ავტობუსის შესაძენად და ციტრუსის მოსავლის აღების ღონისძიებების შეწყობისთვის გადაანაწილეს. ამავე თანხიდან საკრებულოს თანამშრომლები თვის ბოლოს მეცამეტე ხელფასსაც მიიღებენ. 

 

 

სხდომის დაწყებამდე საკრებულოს წევრებს იურიდიულ და საპროცედურო საკითხთა კომისიის თავმჯდომარემ „ნაციონალური მოძრაობიდან“ კიდევ ერთი საკრებულოს წევრის გასვლის შესახებ შეატყობინა, სოფელ მარადიდის მაჟორიტარ  ნადიმ დიდმანიძის თქმით პარტიამ მის სოფელში არჩევნებზე ხმების 30 პროცენტიც ვერ მიიღო, რაც მისი გადაწყვეტილების მიზეზი გახდა, ის საკრებულოში მუშაობას საკრებულოს თავმჯდომარის მალხაზ ფარტენაძის მსგავსად, რომელმაც პარტია რამდენიმე დღის წინ იგივე მოტივით დატოვა, დამოუკიდებელი დეპუტატის სტატუსით გააგრძელებს.

 

ბიუჯეტის განხილვას არასამთავრობო ორგანიზაცია „კორუფციასთან ბრძოლის სანფორმაციო ცენტრის” ხელმძღვანელი მერაბ ღოღობერიძეც ესწრებოდა, რომელმაც საკრებულოს თავმჯდომარეს ბიუჯეტის წარდგენა შეაწყვეტინა: „მე თქვენ წინასწარ მოგმართეთ წერილობით, რომ სიტყვით მინდოდა გამოსვლა, თქვენ კი ისე დაამტკიცეთ დღის წესრიგი, რომ ჩემი გამოსვლის შესახებ არ გიხსენებიათ“, მერებ ღოღობერიძემ საკრებულოს თავმჯდომარე მის  და საკრებულოს სხვა ოპოზიციური პარტიების წევრების მიმართ ცინიკურ დამოკიდებულებაში და ხათუნა ნარიმანიძის ფრაქციის პრივილეგირებულ მდგომარეობაში ჩაყენებაში დაადანაშაულა.

 

 

„საკითხები კარგად არ არის მომზადებული, სხდომა კი არა დომხალია. მართალია ახლა თქვენ უმცირესობაში ხართ, მაგრამ მაინც მოგიწევთ ჩემი არასასიამოვნო საუბრის მოსმენა.“ -ამ სიტყვებით  დისკუსიაში ყოფილი „ქრისტიან-დემოკრატი“, ამჯერად კი დამოუკიდებელი დეპუტატი ვახტანგ კახიძე ჩაერთო რის შემდეგაც მასსა და საკრებულოს თავმჯდომარეს შორის ასეთი დიალოგი შედგა:

 

„-თქვენ სხდომას დომხალი უწოდეთ, ეს თქვენი ხედვა და თქვენი სუბიექტური აზრია, მაგრამ რაც შეეხება უმრავლესობას და უმცირესობას, თქვენი პარტია დიდი ხანია ნაციონალური მოძრაობის სატელიტი იყო. ამაში მე მგონი ეჭვი არავის არ ეპარება. და თუ ნაციონალურმა მოძრაობამ  თხუთმეტი პროცენტი აიღო არჩევნებზე, თქვენს პარტიას ერთი პროცენტიც არ აუღია.

 

 

– გინდათ თქვათ, რომ ამ ორი წლის განმავლობაში თქვენი სატელიტი ვიყავი? – გინდათ თქვათ, გასული ორი წელი მე თქვენ ტაშს გიკრავდით? – რასაც მე თქვენ გეუბნებოდით ღელის ხუხუნი გეგონათ ხომ? – თქვენ თუ მეხსიერება გღალატობთ სხდომის მდივანს ვთხოვოთ და ოქმები ამოვიღოთ.  რომელ კაბინეტში მავალებდი რა უნდა მეთქვა საკრებულოს სხდომაზე? – როცა დაუშვა შეცდომები ჩემმა პარტიამ, მე ის დავტოვე, მაგრამ ზოგიერთისგან გასხვავებით ამით პიარი არ გამიკეთებია.

 

 

– როგორ გეკადრებათ, მე თქვენ კი არა თქვენს პარტიას ვდებ ბრალს.

 

 

-როცა თქვენ ბეშუმში ქვებს ესროდით ივანიშვილს, მე მაშინ დავტოვე პარტია. მე ეს დავგმე, რის გამოც ჩემი და პარტიის ინტერესები გადაიკვეთა და მე პარტია დავტოვე. “

 

 

საკრებულოს სხდომაზე კიდევ ერთი, დამლაგებლის შტატის დამატების შესახებ განაცხადეს: „ოღონდ ტუალეტი დალაგდეს, ოღონდ სუნი აღარ იყოს დერეფნებში და ორივე ხელით თანახმა ვარ“ –  ინიციატივა მოიწონა სულიკო მიქელაძემ. რატომ დგას სუნი სარებულოს შენობის დერეფნებში და შესაკეთებელია თუ არა საკრებულოს საპირფარეშო ამაზე საკრებულოს წევრებმა კიდევ 20 წუთი იკამათეს.

 

 

დაახლოებით ერთსაათიანი კამათის შემდეგ კი, ახალი მანქანის შეძენა ფრაქციითვის, მანქანის შეძენა სახანძრო სამსახურისთვის, ავტობუსის შეძენა მაჭახლის ხეობისთვის, სპორტდაბაზის გარემონტება და ა.შ. 2013 წლის ბიუჯეტში განსახილველად გადადეს. მეცამმეტე ხელფასის გაცემა კი ძალაში დარჩა. მთლიანობაში 2012 წლის ხელვაჩაურის  ბიუჯეტი 13 მილიონ 451 ათას ლარს შეადგენს.

 

 

 

არჩევნებამდე ხელვაჩაურის 22 წევრიან საკრებულოში ოპოზიციას სამი წევრი: რესპუბლიკელი ავთანდილ ბერიძე, (რომელიც მოგვიანებით აბელ ბექტაშვილმა ჩაანაცვლა) კონსერვატორი სულიკო მიქელაძე და „ქრისტიან დემოკრატი“  ვახტანგ კახიძე შეადგენდნენ. თითქმის ორ წლიანი მუშაობის მანძილზე მათ ფრაქციის შექმნა ვერ მოახერხეს, არჩევნების შემდეგ „ნაციონალური მოძრაობა“ საკრებულოს ცხრა წევრმა დატოვა, მათ შორის ექვსმა ხათუნა ნარიმანიძის ხელმძღვანელობით შექმნეს ფრაქცია „წინ სიმართლისაკენ“, აბელ ბექტაშვილსა და სულიკო მიქელაძეს კი ყოფილი „ნაციონალი“ ედნარ კარანაძე შეუერთდა, მათ ფრაქცია „მომავლისათვის“ შექმნეს. „ნაციონალურ მოძრაობაში“ აღარ ირიცხება საკრებულოს თავმჯდომარე მალხაზ ფარტენაძე, დღეს მას ნადიმ დიდმანიძეც შეუერთდა. 

 

 

ამ დროისათვის 22 წევრიან საკრებულოში „ნაციონალურ მოძრაობას“ 10 დეპუტატი წარმოადგენს, მათ შორის ერთი, მერაბ ბოლქვაძე თითქმის ერთი წელია რაც საკრებულოში არ გამოჩენილა.  

 

ხელვაჩაურის საკრებულოს სხდომა
ხელვაჩაურის საკრებულოს სხდომა

გადაბეჭდვის წესი


ასევე: