ხულოს სასპორტო სკოლას რეაბილიტაცია ჩაუტარდება.სპორტსკოლის გასარემონტებლად ხულოს გამგეობამ ადგილობრივი ბიუჯეტიდან 67 796 ლარი გამოყო. სარემონტო სამუშაოებზე ტენდერი 22 ივნისს გამოცხადდა.
ხულოს გამგეობის ინფრასტრუქტურული სამსახურის უფროსის, ზაზა ზოიძის ინფორმაციით, სარეაბილიტაციო სამუშაოების ფარგლებში ბაზა გარემონტდება, გამოიცვლება იატაკი, სახურავი, ხოლო ინტერიერი და გარე ფასადი მოწესრიგდება.
სარეაბილიტაციო სამუშაოები, ელექტრონულ ტენდერში გამარჯვებულ კომპანიასთან ხელშეკრულების გაფორმებიდან 84 დღეში უნდა დასრულდეს.
შესყიდვების ეროვნულ ვებგვერდზე გამოქვეყნებული ინფორმაციით, ხულოს გამგეობა რეაბილიტირებულ სპორტსკოლის შენობას მხოლოდ იმ შემთხვევაში ჩაიბარებს, თუ სარეაბილიტაციო სამუშაოების განმახორციელებელი კომპანია, შესრულებულ სამუშაოების ხარისხთან დაკავშირებით, ხულოს გამგეობას ლევან სამხარაულის სახელობის სასამართლო ექსპერტიზის ეროვნული ბიუროს ან სხვა აკრედიტებული პირის მიერ გაცემულ შესაბამის დასკვნას წარუდგენს.
ხულოს სასპორტო სკოლა, ძირითადად, ჭიდაობის სექციაზეა ორიენტირებული.
