დაბა ქედაში, აღმაშენებლის ქუჩაზე, მუნიციპალიტეტის ადმინისტრაციულ შენობასთან დამაკავშირებელი კიბეების რეაბილიტაცია ქედის გამგეობას 2016 წელს 60 128 ლარი დაუჯდა. კიბეების რეაბილიტაციიდან რამდენიმე თვეში, სპეციალური საღებავი ჩამოიშალა და ერთ მხარეს ჩამოსხმული საყრდენი კედელიც კი დაიბზარა. ბეტონის კიბეები დაზიანებულია.
ქედის გამგეობაში აცხადებენ, რომ სარეაბილიტაციო სამუშაოებზე ორწლიანი გარანტია ვრცელდება და სამუშაოების განმახორციელებელ კომპანია „მშენებელი -5“-ს ხარვეზის აღმოსაფხვრელად წერილობით აცნობეს. გამგეობის ზედამხედველობის სამსახურში იმასაც აცხადებენ, რომ კიბეების მოაჯირებზე არსებული სპეციალური საღებავი მხოლოდ მაშინ უნდა გადაიღებოს, როდესაც ჰაერის ტემპერატურა 30 გრადუსს აღწევს, წინააღმდეგ შემთხვევაში საღებავი ისევ ჩამოიშლება.
მიუხედავად ამისა, გამგეობამ, შარშან ტენდერი მაშინ გამოაცხადა, როცა ზაფხული თითქმის დასრულებული იყო.
„მშენებელი -5“ -ის დირექტორი ჯემალ აბულაძე ამბობს, რომ სპეციალური საღებავის ჩამოშლა ყინვებში შესრულებულმა სამუშაოებმა განაპირობა, რაც შეეხება კედელზე გაჩენილ ბზარს, მისი თქმით, ბზარები კიბეების გვერდით მიმდინარე სამუშაოების შედეგია.
„დეკემბრის თვეში დასრულდა კიბეების სარეაბილიტაციო სამუშაოები. იმ დროისთვის ყინვები დაიწყო, მაგრამ რადგანაც გეგმა-გრაფიკით სამუშაოებს ვერ გავაჩერებდით, საღებავი, რომლითაც მხოლოდ ზაფხულსა და შემოდგომაზე შეიძლება გადაღებო, ყინვებში გავღებეთ, გამოშრობა ვერ მოესწრო და ჩამოცვივდა. ძვირადღირებული საღებავია, საქართველოში არ იყიდება, აზერბაიჯანიდან შემოგვაქვს. იქედან გამომდინარე, რომ ორწლიანი საგარანტიო ვალდებულება გვაქვს, ხარვეზებს აღმოვფხვრით. ველოდებით ამინდის დასტაბილურებას. ახლა რომ გადავღებოთ, მნიშვნელობა არ აქვს, ისევ ჩამოიშლება. 5 000 ლარი დაგვჭირდება,“ – ამბობს ჯემალ აბულაძე.
ქედის გამგეობასა და საკრებულოსთან დამაკავშირებელი კიბეების რეაბილიტაციაზე ტენდერი ქედის გამგეობამ 2016 წლის 16 აგვისტოს 75 160 ლარზე გამოაცხადა.
კიბეების რეაბილიტაციაზე გამოცხადებულ ტენდერში ხელშეკრულება ქედის გამგეობამ „მშენებელი-5“-ს იმავე წლის 21 სექტემბერს 60 128 ლარსა და 98 თეთრზე გაუფორმა. ხელშეკრულებით კომპანიას კიბეების რეაბილიტაცია 2016 წლის ბოლომდე უნდა დაესრულებინა.
დაზიანებული კიბე დაბა ქედაში
