ბათუმში დაკარგულ კაცს ეძებენ.
„ბათუმელებს“ დღეს, 6 სექტემბერს, დაკარგული კაცის დისშვილი, აზერბაიჯანის მოქალაქე, გიუნაი ელიზადე დაუკავშირდა და სთხოვა დახმარება ინფორმაციის გავრცელებაში.
დაკარგული კაცი ჰაფიზ სულეიმანოვიც [Hafiz Süleymanov] აზერბაიჯანის მოქალაქეა და მისი ნათესავის თქმით, მასთან დაკავშირება 28 აგვისტოს შემდეგ ვერ ხერხდება.
„დაკარგული კაცი ჩემი ბიძაა. საზღვრის კამერების ჩანაწერები გადავამოწმეთ და ვიცით, რომ ის თურქეთიდან საქართველოში გადავიდა. ამის შემდეგ მის შესახებ არანაირი ინფორმაცია არ გვაქვს და ვერ ვუკავშირდებით.
მან ტელეფონი თურქეთში დაკარგა, ამიტომ მასთან დაკავშირება ამჟამად შეუძლებელია.
ოჯახი უკვე ეძებს მას და შესაბამის უწყებებსაც მივმართეთ. ძალიან გთხოვთ, თუ ვინმეს გინახავთ ან რაიმე ინფორმაცია გაქვთ მისი ადგილსამყოფელის შესახებ, დაგვიკავშირდით ან აცნობეთ პოლიციას“- გვწერს აზერბაიჯანის მოქალაქე გიუნაი ელიზადე და ბიძის ფოტოს გვიგზავნის.
„ბათუმელები“ დაუკავშირდა შსს-ს და ჰკითხა, მიმართეს თუ არა აღნიშნული პიროვნების დაკარგვასთან დაკავშირებით და თუ მიმდინარეობს რაიმე ტიპის სამძებრო სამუშაოები.
შსს-ში გვითხრეს, რომ დაკარგული პირის სამძებრო სამუშაოები მიმდინარეობს.
