ბელარუსის უშიშროების სამსახურმა ყოფილი პოლიტპატიმრებისა და მათი ნათესავების ოჯახების მასობრივი ჩხრეკა ჩაატარა 23 იანვარს ქვეყნის მასშტაბით.
„ბიბისის“ რუსული რედაქცია წერს, რომ უფლებადამცველებისთვის ცნობილია სულ მცირე 73 ადამიანის გვარი, რომელთა სახლები 23 იანვარს გაჩხრეკეს ან ეს პირები დააკავეს. ბელარუსის ადამიანის უფლებათა ცენტრი „ვიასნა“ აცხადებს, რომ ზოგ შემთხვევაში მთლიანად ოჯახს აკავებდნენ.
როგორც „ვიასნა“ იუწყება, უშიშრობის სამსახური იყენებდა მუხლებს „ექსტრემისტული საქმიანობის დაფინანსებისა“ და „ექსტრემისტულ ფორმირებებში მონაწილეობაზე“.
„ბიბისი“ წერს, რომ რამდენიმე ადამიანს ბელარუსის კგბ-ეს თანამშრომლებმა უთხრეს, რომ დაკავება და ჩხრეკა დაკავშირებული იყო პოლიტპატიმრების დასახმარებლად შექმნილ პროექტთან – INEedHelpBY. ეს პროექტი ეხმარება პოლიტპატიმრებს, რომლებიც ბელარუსში აღიარებულნი არიან როგორც „ექსტრემისტული ფორმირება“ და მათ, ვინც განიცადა პოლიტიკური რეპრესიები და რთულ ფინანსურ მდგომარეობაში აღმოჩნდა.
დაკავებულთა შორის იყვნენ დემოკრატიული მოძრაობის 76 წლის აქტივისტი ბორის ხამაიდა და პოლიტიკოს ნიკოლაი სტატკევიჩის ცოლი, მარინა ადამოვიჩი. სტატკევიჩს 2021 წლის დეკემბერში 14 წლით თავისუფლების აღკვეთა მიუსაჯე, მის ახლობლებს მისგან წერილები დაახლოებით ერთი წელია არ მიუღიათ და არც მისი ჯანმრთელობის მდგომარეობის შესახებ აქვთ ინფორმაცია.
სხვადასხვა შეფასებით, ბელარუსში ამჟამად გისოსებს მიღმა 1400-მდე პოლიტპატიმარია. ლუკაშენკოს რეჟიმის წინააღმდეგ საპროტესტო აქციების ჩახშობისა და მასობრივი რეპრესიების დაწყების შემდეგ ასიათასობით ბელარუსმა დატოვა ქვეყანა.
___________
ფოტო: „ვიასნა“
