უკრაინის შეიარაღებული ძალების სახმელეთო ჯარებისა და აღმოსავლეთის ძალების ჯგუფის მეთაურმა, გენერალ-პოლკოვნიკმა ალექსანდრ სირსკიმ განაცხადა, რომ ბახმუტიდან „ვაგნერის“ გაყვანა და მათი ჩანაცვლება რუსული არმიის ნაწილებით ჭიანურდება.
„სიტუაცია საკმაოდ ბუნდოვანია. მოწინააღმდე, „ვაგნერი“ ბახმუტშია, მაგრამ ის რეალურად არის ერთგვარ თაგვის ხაფანგში. ახლა პრიგოჟინი ცდილობს, თავისი შენაერთების გაყვანას და ჯარის ნაწილების განთავსებას. ეს პროცესი იწელება. ის სხვადასხვა განცხადებას აკეთებს. ჩვენი ამოცანა მხოლოდ ერთია – მტრის დამარცხება, ტერიტორიის გათავისუფლება, წინ წაწევა, საზღვრებისკენ“, – მიმართა სირსკიმ მებრძოლებს.
რამდენიმე დღით ადრე „ვაგნერის“ მფლობელმა, ევგენი პროგოჟინმა განაცხადა, რომ „ვაგნერი“ დატოვებს ბახმუტს პირველ ივნისამდე, თუმცა ბრიტანული დაზვერვა და, ასევე, ომის შესწავლის ამერიკული ინსტიტუტი, წერენ, რომ რუსეთის რეგულარულ არმიას, სავარაუდოდ, ჯერ კიდევ არ ჩაუბარებია „ვაგნერის“ პოზიციები ბახმუტში და მათ ნაცვლად პოზიციების გადაბარება დაიწყეს თვითგამოცხადებული დონეცკის რესპუბლიკის ქვედანაყოფებმა.
მისი თქმით, უკრაინული დანაყოფები იგერიებენ მტრის წინ წაწევის ყველა მცდელობას ბელოგოროვკის, ნოვოსელოვსკისა და ტორსკის რაიონებში.
უკრაინის სამხედრო სარდლობა ამ დრომდე არ ადასტურებს ძალების ბახმუტიდან გაყვანას. 27 მაისს უკრაინის თავდაცვის მინისტრის მოადგილემ ანა მალიარმა განაცხადა, რომ უკრაინული ჯარები აკონტროლებენ ბახმუტის უბანს სამხრეთ-დასავლეთ ნაწილში.
ბახმუტისთვის ბრძოლა უკვე 10 თვე გრძელდება.
