ბათუმში, „შანხაის დასახლებაში“, მერია ორ 8-სართულიან საცხოვრებელ კორპუსს ააშენებს. კორპუსების მშენებლობაზე მერიის საქალაქო ინფრასტრუქტურისა და კეთილმოწყობის სამმართველომ ტენდერი 33 მილიონი ლარით გამოაცხადა.
ეგრეთ წოდებული „შანხაის დასახლება“ ბათუმში, რაფიელ ერისთავისა და ალექსანდრე ჩხაიძის ქუჩებს შორის მდებარეობს.
ტენდერში წინადადებების მიღება 2022 წლის 31 აგვისტოს დაიწყება და ხუთ დღეში, 5 სექტემბერს, დასრულდება. შესყიდვის სატენდერო თანხა 33 097 204 ლარია.
ტენდერის პირობის მიხედვით, საცხოვრებელი კორპუსები 2025 წლის 10 დეკემბრის ჩათვლით პერიოდში უნდა აშენდეს.
ახალი კორპუსები „შანხაის დასახლებაში“ / რენდერი პროექტიდან
ზოგიერთი მონაცემი პროექტიდან:
„საპროექტო ობიექტი განთავსებულია ბათუმში, ა. ჩხაიძის ქ. №7-ში; სანებართვო ფაქტობრივი ფართობი შეადგენს 11 900.0 კვმ-ს. დღეისათვის ნაკვეთზე განთავსებულია გასული საუკუნის სხვადასხვა პერიოდში აშენებული 1-3-სართულიანი ბარაკული ტიპის ნაგებობები.
ნაკვეთს ორი მხრით ემიჯნება საზოგადოებრივი სივრცე ერისთავისა და ჩხაიძის ქუჩის სახით, ხოლო დანარჩენი ორი მხრიდან ემიჯნება სამეზობლო საზღვარს. დასავლეთიდან ემიჯნება საბითუმო ბაზრის ნაკვეთი, ხოლო აღმოსავლეთიდან – კერძო მფლობელობის საცხოვრებელი სახლი.
ნაკვეთზე შენობათა განთავსების რეგულაციის წესის გათვალისწინებით მოეწყო ორი სოციალური მრავალბინიანი საცხოვრებელი „ა“ და „ბ“ კორპუსი.
დავალების თანახმად, განთავსების პრინციპი ასევე ითვალისწინებს შენობების რიგითობით მშენებლობას. „ა“ კორპუსის პირველ რიგში მშენებლობის დაწყების შემთხვევაში მინიზირებულია ასათვისებელი შენობების წილი, რაც იძლევა „ა“ კორპუსის მშენებლობის დასრულების შემდეგ ყველა მობინადრის ბინებით დაკმაყოფილებას და ბარაკების ერთიანად დაშლის შესაძლებლობას.
შენობები არის რვასართულიანი. პირველ სართულზე გათვალისწინებულია სავაჭრო-კომერციული დანიშნულების სივრცეები, ხოლო დანარჩენ შვიდ სართულზე მოეწყო ერთი, ორი, სამი და ოთხოთახიანი საცხოვრებელი ბინები.
ავტომანქანით ეზოში მოხვედრა შესაძლებელია ჩხაიძის ქუჩის მხრიდან, ხოლო ფეხმავალი – ასევე ერისთავის ქუჩიდან. ეზოს აღმოსავლეთი მხრიდან მოეწყო უნივერსალური სპორტული მოედანი. „ა“ და „ბ“ კორპუსებს შორის ეზოში მოეწყო მცირე გამწვანებული სკვერი საბავშვო მოედნით.
კორპუსები მთლიანად ადაპტირებულია შშმ პირებზე და ითვალისწინებს ყველა სივრცეში გადადგილების შესაძლებლობას…“
„შანხაის დასახლება“ ბათუმში / საპროექტო ტერიტორია
„შანხაის“ დასახლებაში ამბობენ, რომ აქ 150-მდე ოჯახი ცხოვრობს.
ამ თემაზე „ბათუმელების“ არქივიდან:
