საქართველოს ტურიზმის ეროვნული ადმინისტრაციის მონაცემებით, მიმდინარე წლის მაისში საქართველოს ადმინისტრაციული საზღვარი რუსეთის 51 561-მა მოქალაქემ გადმოკვეთა.
გასულ წელს, ამავე პერიოდში, საქართველოში 10 818 რუსეთის მოქალაქე იყო შემოსული. ტურიზმის დეპარტამენტის ინფორმაციით, წელს, ფაქტობრივად, რუსეთიდან ვიზიტორების რაოდენობა 376.6 პროცენტითაა გაზრდილი.
ამავე წლის აპრილში შსს-ს მონაცემებით, 48 797 მოქალაქე შემოვიდა. უცნობია, მათგან რამდენი დარჩა საქართველოში და რამდენმა მათგანმა დატოვა ქვეყანა.
მარტში რუსეთიდან 45 068 მოქალაქე შემოვიდა საქარველოში. ასევე უცნობია, მათგან რამდენი დარჩა საქართველოში და რამდენმა მათგანმა დატოვა ქვეყანა.
რუსეთის გარდა, წელს, მაისში, ყველაზე მეტი – 42 606 ვიზიტორი შემოვიდა საქართველოში სომხეთიდან.
რაც შეეხება სხვა ქვეყნების მოქალაქეების მიერ საზღვრის კვეთის მონაცემებს მაისში, სტატისტიკა ასეთია:
- უკრაინიდან 15 005-მა ვიზიტორმა გადმოკვეთა საქართველოს საზღვარი
- აზერბაიჯანიდან – 12 634-მა ვიზიტორმა
- ბელარუსიდან – 9 780-მა ვიზიტორმა
- პოლონეთიდან – 3 388-მა ვიზიტორმა
ამავე პერიოდში ლატვიიდან საქართველოში 1375 ვიზიტორი შემოვიდა, ლიეტუვიდან კი – 1100.
ტურიზმის ეროვნული ადმინისტრაციის განცხადებით, მაისში საერთაშორისო ტურისტული ვიზიტების რაოდენობამ სულ 264 327 შეადგინა, „რაც +173.9%-ით მეტია გასული წლის ანალოგიურ პერიოდთან შედარებით, ხოლო 2019 წლის აპრილის თვის მონაცემებთან შედარებით, ტურისტული ვიზიტები 62.3%-ით არის აღდგენილი“.
ეროვნული ადმინისტრაციის ინფორმაციით, 2022 წლის პირველ 5 თვეში საერთაშორისო ტურისტული ვიზიტების რაოდენობამ 906 670 შეადგინა, რაც +213.8%-ით მეტია გასული წლის ანალოგიურ პერიოდთან შედარებით, ხოლო 2019 წლის მაისის თვის მონაცემებთან შედარებით ტურისტული ვიზიტები 54.8%-ით არის აღდგენილი.
ტურისტული ვიზიტების ბოლო ორი წლის მაჩვენებლების კლება დიდწილად უკავშირდება კორონავირუსის პანდემიასთან დაკავშირებულ შეზღუდვებს.
