რუსულ ტელეარხ Russia Today-ს [RT], რომელიც რუსეთის ფედერაციის ხელისუფლების მიერ მხარდაჭერილი მედიამაუწყებელია, გაერთიანებულ სამეფოში მაუწყებლობის ლიცენზია შეუჩერეს. ამის შესახებ გაერთიანებული სამეფოს სახელმწიფო მარეგულირებელმა – კომუნიკაციების ოფისმა დღეს განაცხადა. როგორც მარეგულირებლის განცხადებაში ვკითხულობთ, გადაწყვეტილება „ძალაშია დაუყოვნებლივ“.
„მივიჩნევთ, რომ RT-ს ლიცენზიანტი ANO TV Novosti არ ერგება და შეუსაბამოა გაერთიანებული სამეფოს მაუწყებლობის ლიცენზიის ფლობისთვის“, – ნათქვამია განცხადებაში.
კომუნიკაციების ოფისი ატარებს 29 მიმდინარე გამოძიებას „RT-ის მიერ ახალი ამბებისა და რუსეთის უკრაინაში შეჭრის საკითხების მიმდინარე მიკერძოებული გაშუქების შესახებ“.
ტელეარხი უკვე გაქრა გაერთიანებულ სამეფოში ყველა სამაუწყებლო პლატფორმიდან. იგი მანამდეც ჩახსნილი იყო, მას შემდეგ რაც, თვის დასაწყისში ის ევროკავშირმა დაბლოკა. როგორც BBC-ი წერს, მიუხედავად იმისა, რომ გაერთიანებული სამეფო ევროკავშირის წევრი აღარაა, ეს მასაც შეეხო, რადგან საფრანგეთსა და ლუქსემბურგში მდებარე სანქცირებული სატელიტები აწვდიდნენ სიგნალს RT-ის გაერთიანებულ სამეფოში სამაუწყებლოდ.
