კურორტ გოდერძიზე წყლისა და კანალიზაციის სისტემების მოსაწყობად აჭარის წყლის ალიანსმა ტენდერი 3 530 760 ლარზე გამოაცხადა.
წინადადებების მიღება 2021 წლის 14 მარტს დაიწყება და 19 მარტს დასრულდება. სამუშაოები კი, ტენდერში გამარჯვებულთან ხელშეკრულების გაფორმებიდან არაუგვიანეს 2022 წლის 31 დეკემბრამდე უნდა დამთავრდეს.
მიმწოდებელი ვალდებულია ერთდროულად იმუშაოს ყველა ლოკაციაზე, აუცილებლობის შემთხვევაში კი უნდა შეძლოს სამუშაოები 24-საათის განმავლობაში აწარმოოს.
ტენდერის მიხედვით, „პროექტის მიზანია კურორტ გოდერძის მე-2 ეტაპის წყალმომარაგების სისტემების მოწყობა. დღევანდელი მდგომარეობით კურორტის წყალმომარაგება შედგება ერთი არსებული სათავისა და ერთი 500 მ3-იანი რეზერვუარისაგან, სათავიდან რეზერვუარამდე მოწყობილი დ=110 მმ პოლიეთილენის მილი.
წარმოდგენილი პროექტით კურორტ გოდერძისთვის მოეწყობა 2 ახალი სათავე ნაგებობა 2 დამოუკიდებელი მაგისტრალით; მოეწყობა არსებული რეზერვუარის გვერდით დამატებით ერთი ახალი 500 მ-3/იანი რეზერვუარი და პერსპექტიული უბნისთვის 600 მ3-იანი რეზერვუარი, ასევე ერთი საქლორატორო. დამატებით დაპროექტდება და მოეწყობა შიდაგამანაწილებელი ქსელი.
ხულოს მუნიციპალიტეტში გოდერძის უღელტეხილის მიმდებარე ტერიტორიაზე [სამთო-სათხილამურო კურორტი “ზანკა”] წყალმომარაგების და საკანალიზაციო სისტემების მოწყობის [მე-2 ეტაპი] სამუშაოებისთვის 2021 წელს დაფინანსდება ტენდერში გამარჯვებულის მიერ სისტემაში დაფიქსირებული საბოლოო ფასის ნახევარი, დარჩენილი თანხა კი, დაფინანსდება 2022 წელს.
ცალკე პროექტის ფარგლებში აჭარის 40-ზე მეტ სოფელში, ასევე დაბებში: ხულოში, შუახევსა და ქედაში, წყლისა და კანალიზაციის სისტემების მოსაწყობად 37 მილიონზე მეტი ევრო დაიხარჯება.
- საქართველოს მთავრობის გადაწყვეტილებით სასტუმროები სამთო კურორტებზე 25 თებერვლიდან გაიხსნა;
- სამთო კურორტებზე არსებული სათხილამურო ტრასები და საბაგიროები კი გაიხსნება 8 მარტიდან;
- აჭარის რეგიონში 2021 წლის 1-ლი მარტიდან, დასაშვებია კვების ობიექტების/რესტორნების/ბარების/კაფეების ფუნქციონირება როგორც გარე, ისე შიდა სივრცეში სტუმრის მიღებით [გარდა სოციალური ღონისძიებებისა], ოღონდ შაბათ-კვირის გარდა;
- სამთო კურორტებზე, მათ შორის, კურორტ გოდერძიზე ნებისმიერი საქონლის/პროდუქტის, როგორც საცალო, ისე საბითუმო რეალიზება ხორციელდება დისტანციურად, მომხმარებლის სარეალიზაციო სივრცეში დაშვების/წვდომის გარეშე. ეს შეზღუდვა არ ეხება: ა) სურსათის/ცხოველის საკვების, ცხოველის, ცხოველური და მცენარეული პროდუქტების, საყოფაცხოვრებო ქიმიისა და ჰიგიენის, ვეტერინარიული პრეპარატების, პესტიციდებისა და აგროქიმიკატების, სათესლე და სარგავი მასალების რეალიზაციას; ბ) ელექტროკომუნიკაციის, ელექტროენერგიის, ბუნებრივი გაზის, წყლის, ბენზინის, დიზელის, თხევადი აირის მიწოდებას; გ) სამედიცინო დანიშნულების საქონლის, ფარმაცევტული პროდუქტის რეალიზაციას; დ) პრესის ჯიხურებს.
ამ თემაზე:
რა შეზღუდვები იხსნება და რა რჩება ძალაში 25 თებერვლიდან – მოკლედ
