ქობულეთში, სოციალური მომსახურების სააგენტოს შენობას ამ წუთებში [10:51 საათი, 3 ოქტომბერი] პოლიცია იცავს. სააგენტოს შენობის წინ სოციალურად დაუცველები აქციას მართავენ, ისინი სოციალური სააგენტოს უფროსთან, თემურ ჭანტურიშვილთან შეხვედრას ითხოვენ. ასევე, სურთ სააგენტოს უფროსმა პირადად შეამოწმოს, თუ რა პირობებში ცხოვრობენ სოციალურად დაუცველები.
“სოციალური მომსახურების სააგენტოს უფროსი პოლიციით იცავს თავს ხალხისგან და აყენებს შეურაცხყოფას,” – უთხრა ბათუმელებს აქციის ერთ-ერთმა მონაწილემ ხათუნა მიქელაძემ. ათეულობით სოციალურად დაუცველი სააგენტოს უფროსისგან ითხოვს განმარტებას, თუ რატომ შეუჩერდათ სოციალური დახმარება.
აქციის მონაწილის თქმით, გუშინ, 2 ოქტომბერს, მივიდნენ სააგენტოში სიტუაციის გასარკვევად, რა დროსაც სააგენტოს უფროსმა შეურაცხყოფა მიაყენა მათ.
“გუშინ ვუთხარი აგვიხსენი, რატომ მოხდა და რატომ შეგვიჩერდა დახმარება-მეთქი. ერთხელ რომ აგვიხსნეს და ვერ გავიგეთ, კიდევ ვთხოვეთ ახსნა. “თქვენ ვერ მიხვდითო. მიუხვედრელები ხართო, არ გაქვთ იმის უნარი, რომ მიხვდეთო, – ასე გვითხრა თემურ ჭანტურიშვილმა,” – ყვება „ბათუმელებთან“ ხათუნა მიქელაძე.
ფოტო მოგვაწოდა ბონდო თედორაძემ
ამავე თემაზე:
რატომ დატოვა სახელმწიფომ 17 ბავშვი და მათი ოჯახები შემწეობის გარეშე
