ბათუმის საერთაშორისო აეროპორტიდან ავიარეისებს ორი ახალი ავიაკომპანია შეასრულებს. პოლონური Small Planet Airlains-ი ვარშავის მიმართულებით, რუსული UTV Aereo კი ყაზანის მიმართულებით იფრენს. Small Planet Airlains-ი გასულ წელს ბათუმის აეროპორტში ჩარტერულ რეისებს ასრულებდა, 2018 წლიდან კი რეგულარულ ფრენებს განახორციელებს.
ჯამში ბათუმიდან მსოფლიოს 19 ქალაქში 19 ავიაკომპანია იფრენს. გეგმის მიხედვით, Fly Dubai აპირებს ავიარეისების სიხშირე გაზარდოს და ყოველდღიური გახადოს. ზაფხულში ასევე გაიზრდება ჩარტერული რეისების რაოდენობაც.
როგორც „ბათუმელებს“ ბათუმის საერთაშორისო აეროპორტის საზოგადოებასთან ურთიერთობის სამსახურში უთხრეს, წლის განმავლობაში არსებული განრიგი შეიძლება შეიცვალოს და რეისები დაემატოს.
2018 წელს ბათუმის საერთაშორისო აეროპორტისთვის ცვლილებების წელი იქნება. აეროპორტის მენეჯმენტი გეგმავს თვითმფრინავებისთვის ხუთი ახალი სადგომის დამატებას. ასევე, დაემატება სარეგისტრაციო მაგიდებიც.
