კვირის ამბები,კვირის ამბები,მთავარი

სასტუმრო WYNDHAM-ი და კაზინო „პრინცესა“ ძველი ფოსტის ადგილზე

24.05.2016 • 8783
სასტუმრო WYNDHAM-ი და კაზინო „პრინცესა“ ძველი ფოსტის ადგილზე

სასტუმროსა და კაზინოს გახსნა ბათუმში ყოფილი ფოსტის შენობაში აგვისტოში იგეგმება, თუმცა კონკრეტული თარიღი ჯერ კიდევ არ არის დაზუსტებული. შენობის მეპატრონემ მოლაპარაკება თითქმის დაასრულა Wyndham Hotel Group-თან, რომელიც მსოფლიოში ცნობილი სასტუმროების ქსელის მფლობელია. შენობის დასრულების სამუშაოების პარალელურად, კომპანიის მეპატრონეები სასტუმროში მუშაობის მსურველთა მონაცემებს აგროვებენ და გრანდიოზული პრეზენტაციისთვის ემზადებიან.

Wyndham Hotel Group-ი 1981 წელს დაფუძნებული ამერიკული კომპანიაა, რომელიც 55 ბრენდს და 7670 სასტუმროს აერთიანებს მსოფლიოში. ბათუმში, მემედ აბაშიძის გამზირზე, ყოფილი ფოსტის შენობის მფლობელი კომპანიის – „აქთივ ბათუმის“ გენერალური მენეჯერის მამუკა ზაქარაძის ინფორმაციით, ყოფილი ფოსტის შენობაში სწორედ ამ ბრენდის სასტუმროს განთავსება იგეგმება.

მიუხედავად იმისა, რომ სამშენებლო სამუშაოები ჯერ კიდევ არ არის დასრულებული, მამუკა ზაქარაძის თქმით, ამ ეტაპზე კომპანიის მენეჯმენტი საპრეზენტაციო ღონისძიებას ამზადებს. მათივე ინფორმაციით, ღონისძიება პომპეზური იქნება და მას მაღალი რანგის სტუმრები დაესწრებიან.
ინფორმაციას იმასთან დაკავშირებით, რომ სასტუმროს გახსნაზე პრემიერ გიორგი კვირიკაშვილის მოწვევას გეგმავენ, კომპანიაში არც უარყოფენ და არც ადასტურებენ: „საქართველოს პრემიერ-მინისტრის კაბინეტისთვის ჯერჯერობით არ მიგვიმართავს. რა თქმა უნდა, პრეზენტაციას მაღალი რანგის სტუმრები დაესწრებიან. სტუმრებთან დაკავშირებით ინფორმაციას მოგვიანებით გავასაჯაროვებთ“.

ახალი სასტუმრო 146-ნომრიანი იქნება. მათ შორის გათლისწინებულია 102 სტანდარტული, 41 დელუქსი, 2 ლუქსი და ერთი საპრეზიდენტო ნომერი. სასტუმროში საკონფერენციო და სადღესასწაულო დარბაზების, რესტორნების, ღამის კლუბის, ასევე სპა ცენტრის, აუზის, ვიტამინბარის და ადმინისტრაციული ოფისების მოწყობა იგეგმება.

ევროპის მოედანი, სასტუმრო და კაზინო ფოსტის ისტორიული შენობის ადგილას. ცაგო კახაბერიძის ფოტო

ევროპის მოედანი, სასტუმრო და კაზინო ფოსტის ისტორიული შენობის ადგილას. ცაგო კახაბერიძის ფოტო

სასტუმროსთან ერთად ექსპლუატაციაში შევა კაზინო „პრინცესაც“~, რომელიც, სავარაუდოდ, შენობის ისტორიულ ნაწილში განთავსდება. კაზინოს შენობას დაახლოებით 1 200 კვ/მეტრი დაეთმობა; კომპანიის მენეჯმენტის ინფორმაციით, კაზინო სტუმრებს 24 საათის განმავლობაში უმასპინძლებს. კაზინოს სტუმრების განკარგულებაში უახლესი თაობის აპარატები იქნება. თუ რამდენი მაგიდა განთავსდება, ჯერ დაზუსტებული ინფორმაცია კომპანიას არ აქვს.

სასტუმროსა და კაზინოში ხუთასამდე ადამიანის დასაქმება იგეგმება. მენეჯმენტის ინფორმაციით, პერსონალის შერჩევა უკვე დაიწყო. „მსურველებს შეუძლიათ მოგვაწოდონ თავიანთი რეზიუმე ელექტრონულ მისამართზე“, – ამბობს გენერალური მენეჯერი მამუკა ზაქარაძე.

კომპანიის გენერალური მენეჯერის განმარტებით, „კანდიდატებს გამოცდილებისა და სხვა საჭირო უნარ-ჩვევების გათვალისწინებით შეარჩევენ. შემდეგ კი კომპანია შერჩეული კანდიდატების გადამზადებას გეგმავს“.

კულტურული მემკვიდრეობის ძეგლი, ყოფილი ფოსტის შენობა, აჭარის მთავრობის ყოფილმა თავმჯდომარემ ლევან ვარშალომიძემ 2010 წელს ოფშორულ ზონაში ამავე წელს დაფუძნებულ კმპანიას „აქტივ ბათუმს“ 2 მილიონ 500 000 დოლარად მიყიდა. კომპანიის მიმართ ლოიალურ დამოკიდებულებას ახალი ხელისუფლებაც იჩენს – რამდენჯერმე აპატიეს და გადაუწიეს ყოფილი ფოსტის შენობაში სასტუმროს გასხნის ვადები.
2016 წლის იანვარში ცნობილი გახდა იმის შესახებ, რომ ფოსტის შენობის ადგილზე სასტუმროსა და კაზინოს მშენებლობას თურქული ჰოლდინგი „მეტრო“ დაასრულებდა. კომპანიამ, რომელმაც მშენებლობა უნდა გააგრძელოს, მთელი ქონება [რაც „ფოსტის“ ადგილზეა] იპოთეკით დატვირთა. ქონების მეპატრონე კვლავაც კომპანია „აქთივ ბათუმია“. „აქტივ ბათუმმა“ ახალი სასტუმროს ასაშენებლად ექვს მილიონზე მეტი ლარის ინვესტიცია განახორციელა.

გადაბეჭდვის წესი


ასევე: