ბათუმში, ვახტანგ გორგასლის ქუჩის ბოლოში, დღეს, 30 ივლისს, გამთენიისას, დაახლოებით 6 საათზე, მსუბუქი ავტომანქანა დაცხრილეს. მანქანას მარჯვენა მხრიდან და საქარე მინაზე რამდენიმე ტყვია აქვს მოხვედრილი. ადგილზე მუშაობს საპატრულო და კრიმინალური პოლიცია.
პერიმეტრზე, რომელიც სამართალდამცავებს აქვთ შემოსაზღვრული, ყრია მასრები და დაზიანებულია რამდენიმე ავტომანქანა. როგორც ჩანს, გორგასლის ქუჩაზე ავტომანქანა, რომელიც დაცხრილეს, ჯავახიშვილის ქუჩის მხრიდან გრიბოედოვის ქუჩის მიმართულებით გადაადგილდებოდა.
დაშავდა თუ არა ვინმე სროლის შედეგად, ამ დროისთვის უცნობია.
სასწრაფო სამედიცინო დახმარების სამსახურში „ბათუმელებს“ განუცხადეს, რომ ადგილზე გასული იყო ბრიგადა, „თუმცა, პაციენტი არ დაგვხვედრია. დაცხრილური მანქანა იდგა, მაგრამ შიგ არავინ იყო“.
ვახტანგ გორგასლის ქუჩის მონაკვეთი, ჯავახიშვილისა და გრიბოედოვის ქუჩებს შორის, ამ დროისთვის გადაკეტილია.
შინაგან საქმეთა სამინისტროს კომენტარს აღნიშნულ ფაქტთან დაკავშირებით მოგვიანებით მოგაწვდით.
ბათუმში ავტომანქანა დაცხრილეს / 30.07.2017 / თედო ჯორბენაძის ფოტოები
