რამდენჯერ დაჰპირდა სამინისტრო მასწავლებლებს ხელფასის გაზრდას – ბოლო წლის ქრონოლოგია



სკოლის მასწავლებლების ხელფასის 2019 წლიდან გაზრდის  შესახებ მიხეილ ბატიაშვილმა პირველად 2018 წლის ივლისში, პარლამენტში განაცხადა. მაშინ ის მინისტრობის კანდიდატი იყო.

მიხეილ ბატიაშვილმა მაშინ თქვა, რომ დეტალებს ვერ დააზუსტებდა, თუმცა აღნიშნა, რომ „ამ მიმართულებით მუშაობა მიდის“, გადაიხედება სისტემა ფიქსირებული და საათობრივი ბალანსის დაცვით.

გასული წლის 14 სექტემბერს იგივე ტექსტი გაიმეორა პრემიერ-მინისტრმა მამუკა ბახტაძემ და 2019 წლისთვის პედაგოგებს ხელფასის გაზრდას ისიც დაჰპირდა. იყალთოს სამონასტრო კომპელექსში, განათლების რეფორმის ხედვის პრეზენტაციაზე პრემიერმა თქვა, რომ 10 ათასი მასწავლებელი გაზრდილ ხელფასს მიიღებდა 2019 წელს. ეტაპობრივად კი, პედაგოგის ხელფასი 2022 წლამდე სამჯერ გაიზრდებოდა.

როგორ? – დეტალებზე არც პრემიერს უსაუბრია. 2018 წლის სექტემბერში უკვე მინისტრმა მიხეილ ბატიაშვილმა ისევ ახსენა ხელფასების გაზრდა და თქვა, რომ სკოლების ბიუჯეტი 0.9 მილიონი ლარით გაიზრდებოდა, რაც ხელფასების ზრდაზეც უნდა ასახულიყო.

ხელფასების ზრდაზე 8 ნოემბერს ისევ გაიმეორა ბატიაშვილმა. „ნეტგაზეთის“ კითხვაზე, რამდენი ლარით გაიზრდება მასწავლებლის საბაზო ხელფასი 2019 წელს? – მინისტრმა ამჯერად თქვა, რომ დეტალები საზოგადოებისთვის ბიუჯეტის პროექტზე მუშაობის დასრულების შემდეგ გახდებოდა ცნობილი.

11 ნოემბერს კი საქართველოს ფინანსთა მინისტრის მოადგილემ, გიორგი კაკაურიძემ განაცხადა, რომ  ბიუჯეტის პროექტით „2019 წელს პედაგოგების ხელფასების მატება, გარდა იმისა, ვინც უფრო მაღალ კატეგორიაში გადავა, დაგეგმილი არ არის“.

დეკემბერში „ბათუმელებმა“ განათლების სამინისტროს ოფიციალურად მისწერა წერილი, სადაც ითხოვდა, ბიუჯეტის პროექტიდან იმ მუხლის დასახელებას, რითაც მასწავლებლების ხელფასების ზრდა იყო 2019 წლისთვის განსაზღვრული. სამინისტრომ ინფორმაცია არ მოგვწოდა.

2019 წლის 18 იანვარს განათლების მინისტრმა განათლების სისტემაში დაგეგმილი ცვლილებების პრეზენტაციაზე პედაგოგების ხელფასების გაზრდაზე ისევ ისაუბრა. მან ამჯერად  თქვა, რომ ხელფასებთან დაკავშირებით ინფორმაცია სექტემბერში გახდება ცნობილი.

რატომ არ გაიზარდა მასწავლებლების ხელფასი 2019 წლის იანვრიდან? რა იქნება სექტემბერში და ხელფასების გაზრდის საკითხი ხომ არ იქნება გამოყენებული წინასაარჩევნო პიარად 2020 წლისთვის დაგეგმილი საპარლამენტო არჩევნებზე?

ამ კითხვით საქართველოს განათლების სამინისტროს „ბათუმელებმა“ დღეს მიმართა. სამინისტროში არც ამ კითხვას უპასუხა.

ხელფასების გაზრდაზე საუბრობდა განათლების ყოფილი მინისტრი მიხეილ ჩხენკელიც,  გასული წლის აპრილში. ის, რომ 2018 წელს პედაგოგებს არ გაუზარდეს ხელფასები მაშინდელმა მინისტრმა იმით ახსნა, რომ „ბიუჯეტი უკვე დაგეგმილი იყო“.

ნეტგაზეთის მასალების სხვა გამოცემებში გადაბეჭდვის წესი
ავტორი
ლელა დუმბაძე, ჟურნალისტი. ტელ: [0042] 27 45 12. lelabatumelebi@gmail.com