„ბათომმა“ საკრებულოს „რივიერასთან“ დაკავშირებული პროცედურის შეჩერება სთხოვა

დღეს, 19 ოქტომბერს, საკრებულოს ღია კარის სხდომაზე  საზოგადოება „ბათომის“ თავმჯდომარემ, ნინო ინაიშვილმა საკრებულოს ე.წ. ჭაჭის კოშკის მიმდებარედ დაგეგმილ სამშენებლო პროექტ „რივიერასთან“ დაკავშირებული პროცედურების შეჩერება სთხოვა.

საპროექტო ტერიტორიაზე განაშენიანების რეგულირების გეგმის მოსამზადებლად გეგმარებითი დავალების გასაცემად ბათუმის მერიაში ადმინისტრაციული წარმოებაა დაწყებული. ნინო ინაიშვილი მიიჩნევს, რომ წარმოება უნდა შეჩერდეს:

„… საქართველოს კულტურული მემკვიდრეობის დაცვის ეროვნულ სააგენტოში მიმდინარეობს ბათუმის ისტორიული განაშენიანებისა და რეგულირების დაცვის ზონების დამტკიცების პროცესი, სადაც აღნიშნული ტერიტორია [საპროექტო ტერიტორია] გახლავთ სადავო. იქედან გამომდინარე, მოხდება თუ არა ეს ადგილი ისტორიული  განაშენიანების დაცვის ზონაში, მნიშვნელოვნად იცვლება ქალაქმშენებლობითი პარამეტრები: სიმაღლე, სტრუქტურა და ასე შემდეგ, ანუ ის პირობები, რომლებიც გაწერილი უნდა იყოს გეგმარებით დავალებებში“, – განაცხადა ნინო ინაიშვილმა სხდომაზე.

მისივე განმარტებით, თუ ბათუმის ისტორიული განაშენიანებისა და დაცვის ზონები დამტკიცდება იმ სახით, როგორც ის წარდგენილი იყო საჯარო განხილვებზე [გულისხმობს გეოგრაფიკის მიერ მომზადებულ დოკუმენტსა და საზღვრებს], მაშინ ამ ტერიტორიაზე დადგენილ წესებთან შეუსაბამო დავალების გაცემა შესაძლოა ამოვარდნილი იყოს კონტექსტიდან და ვეღარ შეთანხმდეს გრგ და ასევე, არქიტეტურული პროექტი,  რაც, თავის მხრივ, ზიანს მიაყენებს მესაკუთრეს.

ბათომის“ თავმჯდომარემ ღია კარის სხდომაზე ინფომირების პრობლემაზეც ისაუბრა. ის მიიჩნევს, რომ ასეთი მასშტაბის სამშენებლო პროექტების შესახებ მხოლოდ საკრებულოს ვებგვერდსა და გაზეთ „აჭარაში“ განცხადების გამოქვეყნება საკმარისი არ არის.  მან საკრებულოს  სთხოვა, უზრუნველყოს დაინტერესებული ორგანიზაციების, სამოქალაქო მრჩეველთა საბჭოსა და მოსახლეობის მაქსიმალური ჩართულობა.

ვრცლად ამ თემაზე:

„ტრამპ თაუერი“ 44 სართული, „სილქ თაუერი“ – 42? -„რივიერას“ ტერიტორიაზე გეოლოგიური კვლევა დაიწყო

ნეტგაზეთის მასალების სხვა გამოცემებში გადაბეჭდვის წესი


ავტორი