ლარს ფონ ტრიერის და პაველ პავლიკოვსკის ფილმები – რას ნახავთ დღეს ბათუმის კინოფესტივალზე

დღეს, 20 სექტემბერს, საავტორო კინოს ბათუმის საერთაშორისო ფესტივალზე კინოთეატრ „აპოლოში“ შემდეგი ფილმები იქნება ნაჩვენები:

  • 12 საათზე: „ბათუმის ერთი დღე“, რეჟისორი: თეატრისა და კინოს სახელმწიფო უნივერსიტეტისა და ბათუმის სახელოვნებო სასწავლო უნივერსიტეტის სტუდენტთა ჯგუფი. „ნიკო მარის კვალდაკვალ“ რეჟისორი: ვასო ჩავლეიშვილი. „დევნილობის ცხრა წელი“ რეჟისორი: თორნიკე კოპლატაძე

ქართველი რეჟისორებისა და სტუდენტების ფილმები  სექცია „ქართულ პანორამაში“ იქნება წარმოდგენილი. „ბათუმის ერთი დღე“ არასეზონური, ზამთრის ბათუმის შესახებ გვიამბობს; „ნიკო მარის კვალდაკვალ“ – შოტლანდიელი აგრონომის, იაკობ მარის გურიაში დამკვიდრებასა და ნიკო მარის ცხოვრების შესახებ; „დევნილობის ცხრა წელი“ კი 2008 წლის რუსეთ-საქართველოს ომის შედეგებს გვაჩვენებს.

  • 14 საათზე: „ჰამლეტი“, რეჟისორი: გიორგი მეგრელიშვილი 

შექსპირის ტრაგედიის თანამედროვე ევრსია Samsung Galaxy 6-ითაა გადაღებული. ტექსტი ივანე მაჩაბლის თარგმანს მიჰყვება, მოქმედება კი 21-ე საუკუნეში ხდება.

  • 16 საათზე: „სიმონ პეტლიურას საიდუმლო დღიური“, რეჟისორი: ოლეს იანჩუკი

ფილმი 1917-1921 წლებში უკრაინის დამოუკიდებლობისთვის გაჩაღებულ ბრძოლას შეეხება. სიმონ პეტლიურა, უკრაინის რესპუბლიკის მთავარსარდალი ცდილობს ბოლშევიკები აარიდოს ქვეყანას, ბრძოლაში დამარცხების შემდეგ კი იძულებული ხდება, ემიგრაციაში წავიდეს.

  • 18:30 საათზე: „რეზო“, რეჟისორი: ლეო გაბრიაძე 

ფილმი ქართველ მხატვარზე, მწერალსა და მარიონეტების დამაარსებელ რეზო გაბრიაძეზეა. ეს არის ანიმაციური, ავტობიოგრაფიული ფილმი, რომელიც რეზო გაბრიაძის შვილმა, ლეო გაბრიაძემ გადაიღო.

  • 20 საათზე: „ცივი ომი“, რეჟისორი: პაველ პავლიკოვსკი 

სიყვარულის ისტორია, რომელიც 50-იან წლებში, ცივი ომის ფონზე ვითარდება. ფილმი რეჟისორმა თავის მშობლებს მიუძღვნა. 2018 წელს, კანის კინოფესტივალზე, პავლიკოვსკი ამ ფილმისთვის საუკეთესო რეჟისორად დაასახელეს.

  • 22 საათზე: „სახლი, რომელიც ჯეკმა ააშენა“, რეჟისორი: ლარს ფონ ტრიერი

ფსიქოლოგიური თრილერი სერიული მკვლელის შესახებ, რომელშიც მთავარ როლებში მეტ დილონს, უმა თურმანსა და რაილი კიოს ნახავთ. Guardian-თან ლარს ფონ ტრიერმა აღნიშნა, რომ ფილმი დონალდ ტრამპითაა შთაგონებული და „ცხოვრება ბოროტებაა, რაც მტკიცდება ჰომო ტრამპუსის – ვირთხების მეფის აღზევებით.“

________________

კინოფესტივალზე დასწრება უფასოა. ჩვენებებზე დასწრებისთვის საჭიროა ე.წ. „უფასო ბილეთი“ (რაც დაჯავშნისა და კონტროლისთვის გამოიყენება), რომლის აღებაც კინოთეატრ „აპოლოს“  BIAFF საინფორმაციო ცენტრშია შესაძლებელი.

ბათუმში კინოფესტივალი კვირის ბოლომდე გაგრძელდება.

_______

მთავარ ფოტოზე: გასპარ ნოეს ფილმის ჩვენება „აპოლოში“. კინოფესტივალზე, საღამოს კინოსეანსებზე განსაკუთრებული ხალმხმრავლობაა. ქეთი კორძაძის ფოტო 

ნეტგაზეთის მასალების სხვა გამოცემებში გადაბეჭდვის წესი


ავტორი
ნანა კვაჭაძე, ჟურნალისტი ელფოსტა: kvachadze.n@gmail.com