გურიის რეგიონში აზიური ფაროსანას წინააღმდეგ წამლობის პირველი ეტაპი უკვე დასრულდა. სურსათის ეროვნული სააგენტოს გურიის სამმართველოს ხელმძღვანელი განხორციელებულ სამუშაოებს აფასებს და განმარტავს, რომ რეგიონში ყველაზე დიდი რაოდენობით მავნებელი ლანჩხუთის მუნიციპალიტეტში დაფიქსირდა და წამლობაც სწორედ აქედან დაიწყო. განხორციელებული ღონისძიებების შედეგად, მავნებლმა ლანჩხუთიდან ოზურგეთისა და ჩოხატაურის მუნიციპალიტეტში გადაინაცვლა. აქ წამლობა პარალელურ რეჟიმში მიმდინარეობდა.
ამ ეტაპზე გურიის რეგიონში უკვე შეწამლულია 20 ათას ჰექტრამდე ფართობის საკარმიდამო მიწები, ასევე მოიზიდე და მოკალის პრინციპით 8 ათასი ჰექტარი ფართობის ტყისპირები.
ფოტო: ჟურნალისტიკის რესურსცენტრი
ზაფხულის პერიოდში ტემპერატურის მატება აზიური ფაროსანას გავრცელბასთან პირდაპირ კავშირშია, სპეციალისტი მავნებლის კიდევ ურო მეტად გააქტიურებას პროგნოზირებს. ნინო შეწირულის თქმით, აზიური ფაროსანას აქტივობის შეფასება მონიტორინგის სისტემებზე დაკვირვებით ხორციელდება.
მისი თქმით, რეგიონში 18 ერთეული სპეცტექნიკა მუშაობს. იმ შემთხვევაში, თუ მავნებელთან ბრძოლის პროცესში დამატებითი ძალების მობილიზება გახდება საჭირო, მსგავს დახმარებას აზიურ ფაროსანასთან ბრძოლის საკოორდინაციო შტაბი განახორციელებს.
„აზიურ ფაროსანასთან ბრძოლის გეგმა ტემპერატურის მატებასთან ერთად ყოველდღიურად შეიძლება შეიცვალოს. ამიტომ ყველაზე მნიშვნელოვანია ყოველდღიური მონიტორინგი. დღეს თუ ფერომონზე 2 აზიური ფაროსანა დაფიქსირდა, ხვალ შეიძლება წამლობის მეორე ეტაპის დაწყების სიგნალის გაშვება გახდეს საჭირო.“ – აცხადებს ნინო შეწირული.
გურიაში, სოფელ შემოქმედის ადგილობრივი მოსახლეობა ამბობს, რომ მავნებლის წინააღმდეგ ტერიტორიების თერმული ნისლით დამუშავებისას მათი წინასწარი გაფრთხილება არ მომხდარა.
„ჩვენს სოფელში არავის გავუფრთხილებივართ. წამლობა რომ დაიწყეს, დილით ბავშვები მოსახლეობას ბაღში მიჰყავდა და მათ თერმული ნისლის გავლა მოუწიათ. ამის შემდეგ ოზურგერთში გააფრთხილეს მოსახლეობა, მაგრამ ჩვენთან არავინ მოსულა.“- ამბობს სოფელ შემოქმედის მკვიდრი ცისანა ანდღულაძე.
მოსახლეობის ინფორმირების პროცესში რომ ხარვეზები იყო, ინფორმაცია აქვთ თავად სურსათის ეროვნულ სააგენტოშიც. ნინო შეწირულის თქმით, შეწამვლის პირველი ფაზის დროს მოსახლეობის ინფრომირება რთულად ხდებოდა, თუმცა მეორე ფაზის დაწყებამდე პროცესში ადგილობრივი ხელისუფლების წარმომადგენლების ჩართულობა გაზრდილია.
მისი თქმით, გაფრთხილების შეტყობინება ყველა მუნიციპალიტეტებს წამლობამდე 24 საათით ადრე ეგზავნებათ. სპეციალისტს მიაჩნია, რომ მოსახლეობის ინფორმირებულობა სოფლის რწმუნებულების პასუხიმსგებლობაა.
ნინო შეწირული მოსახლეობას კიდევ ერთხელ ახსენებს უსაფრთხოების ნორმებს:
„შეწამვლითი სამუშაოების დროს ერთ-ერთი ყველაზე მნიშვნელოვანი მეფუტკრე ფერმერებთან კომუნიკაცია იყო. გურიაში სპეციალური შეხვედრა მოეწყო, სადაც დარგის წარმომადგენლებთან ერთად წამლობის მექანიზმებსა და დროზე იმსჯელეს. სპეციალისტებმა მეფუტკრეთა რეკომენდაციები მაქსიმალურად გაითვალისწინეს.“
მოსახლეობის ინფორმირებულობისთვის გატარებულ ღონისძიებებთან დაკავშირებით, ლანჩხუთის ადმინისტრაციულ ერთეულში მერის წარმომადგენელი განმარტავს, რომ ადგილობრივები წამლობის დაწყებამდე გააფრთხილეს, ხოლო მეფუტკრეებს სატელეფონო ზარის მეშვეობით მიაწოდეს ინფორმაცია.
„ჩვენს ადმინისტრაციულ ერთეულში ფართობების თერმული ნისლით დამუშავების დაწყებამდე, მოსახლეობას ხმის გამაძლიერებლით, ე.წ. რუპორით ვაფრთხილებთ.“ – ამბობს ლაშა დუდუჩავა.
აზიური ფაროსანას წინააღმდეგ წამლობის განრიგის ნახვა ასევე შესაძლებელია საიტზე www.farosana.ge.
___________________________________________________________________
სტატია მომზადებულია ,,ევროპის რეკონსტრუქციისა და განვითარების ბანკის“ EBRD-ისმხარდაჭერით ,,ერთად ვებრძოლოთ აზიურ ფაროსანას“ პროექტის ფარგლებში, რომელსაც,,ჟურნალისტიკის რესურსცენტრი“ – JRC პარტნიორმედიასაშუალებებთან ერთად ახორციელებს. ის შესაძლოა არ წარმოადგენდეს EBRD-ის შეხედულებას.
