ვისთან ატარებთ დიდ დროს? – ამერიკელი ნეირობიოლოგის რჩევები

აქვს თუ არა ჩვენს ტვინს უნარი, დაუკავშირდეს გვერდით მყოფი ადამიანის ტვინს ისე, რომ ჩვენ ეს ვერ შევნიშნოთ? შესაძლებელია, თუკი დავუჯერებთ სხვადასხვა ადამიანის ტვინის სინქრონული ნეიროიმპულსების შესახებ კვლევის შედეგებს. მკვლევარი, ილინოისის შტატის ჩრდილო-დასავლეთის უნივერსიტეტის პროფესორი, ნეირობიოლოგი მორან სერფია, რომელმაც კვლევის შედეგებზე  BBC-სთან ისაუბრა.

მორან სერფმა ტვინის სკანირების მეთოდი გამოიყენა, რომლის დროსაც ეკრანზე ინთებოდა ტვინის სხვადასხვა ნაწილი სხვადასხვა გამღიზიანებელზე.

მკვლევარი სკანირების მეთოდით დააკვირდა იმ ადამიანების ტვინებს, რომლებიც დროს დიდხანს ატარებდნენ ერთად და დააგინა, რომ ასეთი ადამიანების თავის ტვინის ნეირონების აქტიურობის ხარისხი თანდათან ერთმანეთს ემსგავსება ან სულაც იდენტური ხდება.

კვლევის მიხედვით, თუ დიდ დროს ატარებთ ვინმესთან, ორივეს ტვინი სინქრონულად იწყებს მუშაობას.

ერთ-ერთი კვლევის დროს ერთდროულად დააკვირდნენ ორი ადამიანის ტვინს, რომლებიც იმ მომენტში ერთსა და იმავე ვიდეორგოლს უყურებდნენ და მათი ტვინის აქტივობის ხასიათი იყო სრულიად იდენტური. კვლევის ავტორებმა ამ პროცესს  ელექტრონული სინქრონიზაცია უწოდეს, ეს მსგავსება კარგად ჩანდა კომპიუტერის ეკრანზე.

„მხოლოდ ორი კვირის განმავლობაში ერთი და იმავე ფილმების ყურებით, წიგნების კითხვით, მსგავს ცხოვრებისეულ სიტუაციაში აღმოჩენით და მხოლოდ ერთმანეთთან საუბრით ადამიანები იწყებენ ერთნაირი ენობრივი კონსტრუქციების გამოყენებას, განიცდიან ერთნაირ ემოციებს და უჩნდებათ სხვადასხვა საკითხზე მსგავსი ხედვა“, – ამბობს პროფესორი სერფი BBC-სთან საუბრისას.

მისივე თქმით, ეს იმას ნიშნავს, რომ ყველაზე მთავარი რამ, რაც უნდა განვსაზღვროთ, ეს არის სწორად გათვლა – ვისთან ერთად ვატარებთ დროს. ახლობლები გარკვეულწილად გავლენას ახდენენ რეალობის ჩვენეულ აღქმაზე და ძალიან რთულია ზუსტად შევნიშნოთ ან ავხსნათ ეს გავლენები, – ამბობს მორან სერფი.

„თუ შეუფერებელ ან ცუდ პარტნიორს აირჩევთ და მასთან ერთად 10 წელს გაატარებთ, ეს პერიოდი თქვენზე ძალიან დიდ და ცუდ გავლენას მოახდენს,“- ირწმუნება მკვლევარი.

სერფი დააკვირდა, რომ ადამიანები კონკრეტულ მომენტში იღებენ რაღაც გადაწყვეტილებებს და ჰგონიათ, რომ ეს მათი გადაწყვეტილებაა. გარკვეული დროის გასვლის შემდეგ კი ხვდებიან, რომ ესა თუ ის ნაბიჯი სინამდვილეში სხვების გავლენით გადადგეს. ეს არ არის მაინცადამაინც სასიამოვნო შეგრძნება და ნეირობიოლოგის თქმით, ბევრ ადამიანს აქვს უნარი წარსულის ამბების გამოგონების, საკუთარი თავის დარწმუნების, რომ გადაწყვეტილება სწორად მიიღო.

მკვლევარის აზრით, არსებობენ ადამიანები, რომლებმაც მძიმე ტრავმები გადაიტანეს და მიუხედავად ამისა, ტვინს აიძულებენ მოახდინოს მოვლენების რეინტერპრეტაცია და განცდილის შემსუბუქება. ეს არის ერთგვარი ხერხი ნანახისა და განცდილის გარემომცველ სამყაროსთან ბუნებრივად შერწყმისა.

„რეალობის ინტერპრეტაცია საკმაოდ რთულია, თუ ეს მეთოდი აქამდე არასდროს გიცდიათ, ამისთვის შეგიძლიათ დრო იმ ადამიანებთან გაატაროთ, რომლებსაც მსგავსი უნარი გააჩნიათ.

თუ ასეთი ადამიანების გარემოცვაში საკმარის დროს გაატარებთ, გაცილებით მეტ კმაყოფილებას იგრძნობთ ცხოვრებისგან და ეს მოხდება თავისთავად, ძალდატანების გარეშე, რადგან ბუნებრივად ამოქმედდება სხვადასხვა ადამიანის ტვინის სინქრონიზაციის წესი,“ – მიიჩნევს მორან სერფი.

 წყარო: BBC

ნეტგაზეთის მასალების სხვა გამოცემებში გადაბეჭდვის წესი


ავტორი
თამუნა ნერგაძე არის "ბათუმელების" რეპორტიორი 2017 წლის ოქტომბრიდან