![რა ხდება ჩაქვში, საიდანაც ივანიშვილს ხეები გააქვს [ფოტო, ვიდეო]](https://batumelebi.netgazeti.ge/wp-content/uploads/2018/01/xe-qaver.jpg "რა ხდება ჩაქვში, საიდანაც ივანიშვილს ხეები გააქვს [ფოტო, ვიდეო]")
აქვს თუ არა ნებართვა კომპანიას, რომელიც ჩაქვში, ბიძინა ივანიშვილის პარკისთვის მრავალწლოვან ხეებს იღებს და შეკვეთილში გადასატანად ამზადებს? – ამ კითხვაზე პასუხს აჭარის მთავრობიდან 11 იანვრის შემდეგ ველოდებით.
ქვეყნის ყოფილმა პრემიერ-მინისტრმა, ბიძინა ივანიშვილმა ხეების გატანა აჭარიდან პირველად 2016 წელს დაიწყო. დადასტურებულია, რომ აჭარის მთავრობამ მას შემდეგ ყველა ის მიწა გაყიდა კერძო კომპანიებზე, საიდანაც მოგვიანებით ბიძინა ივანიშვილმა ხეები გაიტანა. გამონაკლისია ჩაქვი, უმაღლესი საბჭოს მიმდებარე ტერიტორია – სახელმწიფო საკუთრებიდან დენდროლოგიურ პარკში ხეებს გადასატანად უკვე ერთი კვირაა ამზადებენ.
ხეების გადატანის გამო მოშლილი გზის დამცავი ნაგებობა ჩაქვში, აჭარის უმაღლესი საბჭოს შენობის მიმდებარედ. /22.01.2017 / თედო ჯორბენაძის ფოტო
ჩაქვი. ამ ადგილზე, რომელიც აჭარის უმაღლესი საბჭოს შენობიდან რამდენიმე მეტრში მდებარეობს, ხეების ამოღება ინტენსიურად მიმდინარეობს. /22.01.2017 /
გადაჭრილი ხის ძირი, რომელსაც ჩაქვში ამოღებულ სხვა ხესთან ერთად, შეკვეთილში გადაიტანენ
მახინჯაურში, ზღვისპირას მდებარე მიწის ოთხი ნაკვეთი, მათ შორის ეს ადგილი, სადაც დღეს, 23 იანვარს, ხეებს იღებენ და შეკვეთილში გადასატანად ამზადებენ, საქართველოს მთავრობამ პირდაპირი მიყიდვის ფორმით, 660 ათას ლარად „აჭარის კურორტებს“ [ფაქტობრივად სილქ როუდ ჯგუფს] გადასცა.
ბილიკი, რომელიც ნარინჯის წმ. გიორგის ეკლესიასთან ადიოდა, გადათხრილია. მრავალწლოვან ხეებს ეკლესიიდან რამდენიმე მეტრში იღებენ. ემუქრება თუ არა რაიმე საფრთხე ეკლესიას? – ბათუმისა და ლაზეთის ეპარქიის პრესცენტრში „ბათუმელებს“ უთხრეს, რომ მათ ინფორმაცია არ აქვთ.
წმ.გიორგის ეკლესია [მაღლა]
ბათუმში, მწვანე კონცხის დასახლებაში მდებარე 20 366 კვ/მ არასასოფლო-სამეურნეო დანიშნულების მიწის ნაკვეთი საქართველოს მთავრობამ პირდაპირი მიყიდვის ფორმით, 931 ათას ლარად, საკუთრებაში გადასცა კომპანიას, რომელიც კერძო პირმა ქონების გადაცემამდე რამდენიმე დღით ადრე დაარეგისტრირა. ბიძინა ივანიშვილის პარკში გადასატანად ხეებს ამ ტერიტორიაზეც იღებენ.
[crosslist]
- ხეები მახინჯაურში, თამარ მეფის გამზირის მიმდებარედ, ყოფილ სანატორიუმ „კოლხიდას“ ტერიტორიაზეც ამოიღეს.
- ხეებთან მისასვლელი გზის მოსაწყობად კი ყოფილ სანატორიუმ „მზიურის“ ტერიტორიას იყენებდნენ. ამ სამუშაოებისთვის აქ რამდენიმე ძირი მრავალწლოვანი ნაძვი და მაგნოლია მოჭრეს. ეს ტერიტორიები კი აჭარის მთავრობამ გაასხვისა.
- მრავალწლოვანი ხეები ე.წ. დენდროლოგიურ პარკში გადასატანად ამოიღეს ჩაქვშიც, პლაჟის მიმდებარე მიწის ნაკვეთებზე, რომლებიც, სახელმწიფომ უპირობო აუქციონითა და პირდაპირი მიყიდვის წესით გაასხვისა.
[/crosslist]
სახელმწიფო ქონების ეროვნულმა სააგენტომ და აჭარის ფინანსთა და ეკონომიკის სამინისტრომ ქობულეთში, სოფელ ციხისძირში, ჯამში 18 136 კვ/მ მიწის ნაკვეთები, აუქციონზე ყოველგვარი პირობის გარეშე გაყიდეს. უძრავი ქონება სახელმწიფოსგან ბიძინა ივანიშვილის კომპანიამ „ბიზნეს დეველოპმენტმა“ 1 მილიონ 99 ათას ლარად, ანუ 1 კვ/მ მიწის ნაკვეთი – 60 ლარად და 60 თეთრად შეიძინა. „ბიზნეს დეველოპმენტის“ მიერ შესყიდული ტერიტორიიდან ბიძინა ივანიშვილის კუთვნილი პარკისთვის რამდენიმე მრავალწლოვანი ხე იქამდე გადაიტანეს, ვიდრე ამ ნაკვეთებს სახელმწიფო გაყიდდა. აუქციონზე გაყიდულ ტერიტორიასთან ახლოსაა ასევე ის ადგილი, საიდანაც ბიძინა ივანიშვილმა პირველად გაიტანა მრავალწლოვანი ტიტას ხე.
ადგილი ბათუმში, თამარ მეფის გამზირის მიმდებარედ, საიდანაც მრავალწლოვანი ხე ამოიღეს და შეკვეთილში, ბიძინა ივანიშვილის დენდროლოგიურ პარკში გადაიტანეს. ამ ადგილთან ახლოს კიდევ რამდენიმე ხეს იღებენ შეკვეთილში გადასატანად. ხეების ამოღების გამო რკინიგზის მიმდებარე ტერიტორია დატბორილია. სანიაღვრე არხის გაწმენდით სამუშაოებს კი დღეს, 23 იანვარს, აქ „საქართველოს რკინიგზა“ აწარმოებდა.
ამავე თემაზე:
https://batumelebi.netgazeti.ge/news/82519/
