ფაკულტეტზე შემუშავებულია ისეთი საგანმანათლებლო პროგრამები, რომლებიც აკმაყოფილებს დასაქმების ბაზრის მზარდ მოთხოვნებს. ჩვენთან ხორციელდება საბაკალავრო, სამაგისტრო, სადოქტორო და პროფესიული აკრედიტებული საგანმანათლებლო პროგრამები. მათ თავისებურებას განაპირობებს ძირითად სასწავლო კურსებთან ინტეგრირებული მართვის ავტომატიზებული სისტემების ისეთი საინჟინრო კომპიუტერული პროგრამები, როგორიცაა: AUTOCAD, LIRA, MATHCAD, MATLAB, C++, SAP 2000 და სხვა, რომლებიც პასუხობენ ტექნიკისა და ტექნოლოგიების თანამედროვე მოთხოვნებს.
ფაკულტეტს გაფორმებული აქვს თანამშრომლობის მემორანდუმი რეგიონის წამყვან საინჟინრო და აგრარული მიმართულების კომპანიებთან, რომლის საფუძველზეც სტუდენტები გადიან საწარმოო პრაქტიკასა და სტაჟირებას შემდგომი დასაქმების პერსპექტივით.
ფაკულტეტს საინჟინრო და აგრარული ტექნოლოგიების მიმართულებით მჭიდრო ურთიერთობა აქვს ევროპის წამყვან უნივერსიტეტებთან: 1. ბრანდენბურგის ტექნოლოგიური უნივერსიტეტი; 2. ებერსვალდეს მდგრადი განვითარების უმაღლესი სასწავლებელი; 3. ტურინის პოლიტექნიკური უნივერსიტეტი; 4. სტოკჰოლმის სამეფო ტექნოლოგიური უნივერსიტეტი.
ტექნოლოგიური ფაკულტეტის საგანმანათლებლო პროგრამები ორი მიმართულებით _ ინჟინერიისა და აგრარული მიმართულებით ხორციელდება. სტუდენტთა განათლების სრულყოფას ემსახურებიან კვალიფიციური კადრები, რომლებიც წარმოდგენილი არიან 37 პროფესორისა და დაახლოებით ამდენივე მოწვეული სპეციალისტის სახით.
ტექნოლოგიურ ფაკულტეტზე ფუნქციონირებს ოთხი დეპარტამენტი:
– ინჟინერიისა და მშენებლობის დეპარტამენტი
– ტექნოლოგიებისა და საინჟინრო მენეჯმენტის დეპარტამენტი
– აგროეკოლოგიისა და სატყეო საქმის დეპარტამენტი
– აგროტექნოლოგიისა და აგროინჟინერიის დეპარტამენტი
საბაკალავრო დონეზე ხორციელდება შემდეგი საგანმანათლებლო პროგრამები:
– მშენებლობა (სრული სახელმწიფო დაფინანსებით)
– არქიტექტურა
– ტელეკომუნიკაცია
– ტრანსპორტი
– სამთო და გეოინჟინერია აგრონომია (სრული სახელმწიფო დაფინანსებით)
– სასურსათო ტექნოლოგია
– სატყეო საქმე
– აგროინჟინერია
სამაგისტრო საფეხურზე ხორციელდება შემდეგი საგანმანათლებლო პროგრამები:
– სამოქალაქო და სამრეწველო მშენებლობა
– ტელეკომუნიკაცია
– ნავთობისა და გაზის მოპოვების ტრანსპორტირებისა და შენახვის ტექნიკა და ტექნოლოგიები
– აგრარული ტექნოლოგიები
სადოქტორო საფეხურზე ხორციელდება შემდეგი საგანმანათლებლო პროგრამები:
– აგროეკოლოგია მცენარეთა დაცვა
ფაკულტეტზე სრული სახელმწიფო დაფინანსებით ხორციელდება IV საფეხურის შემდეგი პროფესიული საგანმანათლებლო პროგრამები:
– არქიტექტორ-ტექნიკოსი
– კომპიუტერული საინჟინრო გრაფიკის (AutoCAD) ოპერატორი
– სატელეკომუნიკაციო ქსელებისა და სისტემების ექსპლუატაციის ოპერატორი
– ელექტროამძრავისა და ელექტრომომმარაგებელი დანადგარების ოსტატი
– ნავთობის და გაზის მეურნეობის ტექნიკოსის
– მცენარეთა დაცვის ტექნიკოსი
ბათუმის შოთა რუსთაველის სახელმწიფო უნივერსიტეტში მოქმედი გაცვლითი პროგრამების საშუალებით ტექნოლოგიური ფაკულტეტის სტუდენტებს შეუძლიათ სწავლა გააგრძელონ საზღვარგარეთ, უცხოეთის წამყვან უნივერსიტეტებში.
ტექნოლოგიური ფაკულტეტის კურსდამთავრებულები კონკურენტუნარიანი, ბაზარზე მოთხოვნადი, მაღალკავალიფიური სპეციალისტები არიან. მათი დასაქმების ძირითადი სფეროებია: სამშენებლო კომპანიები (მშენებელი, არქიტექტორი, სამუშაოთა მწარმოებელი, ინჟინერი), ნავთობის ტერმინალები, გაზისა და გაზსადენების კომპანიები, სატრანსპორტო ქსელები და ტრანსპორტის ინფრასტრუქტურა, სატელეკომუნიკაციო კომპანიები.
თანამედროვე ყოფა თავის ტემპებს და ცხოვრების მაღალ კრიტერიუმებს გვთავაზობს. საინჟინრო და აგრარული დარგი საქართველოში სახელმწიფო პრიორიტეტთა რიგშია. ჩვენი უპირველესი მიზანია, ტექნიკისა და ტექნოლოგიების თანამედროვე მოთხოვნათა შესაბამისად მოვამზადოთ ამ დარგებისათვის მაღალკვალიფიციური კადრები. ტექნოლოგიური ფაკულტეტი, რომელსაც დიდი ხნის ისტორია აქვს, ყოველთვის იზიდავდა აქტიურ, საფუძვლიანი ცოდნის მიღების მსურველ ახალგაზრდებს. ჩვენს ფაკულტეტს დიდი შესაძლებლობა აქვს იმისა, რომ სტუდენტებს მისცეს არა მხოლოდ თანამედროვე განათლება, არამედ ჩამოუყალიბოს მათ ისეთი უნარ-ჩვევები, რაც მნიშვნელოვნად გაზრდის მათ კონკურენტუნარიანობას საინჟინრო და აგრარული საქმიანობის სფეროში.
იმ აბიტურიენტებს, რომლებსაც მიზნად აქვთ ტექნიკური და ტექნოლოგიური უმაღლესი განათლების მიღება, მინდა ვუსურვო, წარმატებით ჩაებარებინოთ ერთიანი ეროვნული გამოცდები და გამხდარიყვნენ ბათუმის შოთა რუსთაველის სახელმწიფო უნივერსიტეტის სტუდენტები, რაც გახდება ცხოვრებაში მათი წარმატების საფუძველი.
