დღეს, 17 მარტს, აქციის მონაწილეებმა ბათუმში, აჭარის მთავრობის ადმინისტრაციულ შენობასთან ქუჩა დაახლოებით 20 წუთით გადაკეტეს. აქციის მონაწილეები კორპუსების დაუსრულებელ მშენებლობებს აპროტესტებენ და დავის გადაწყვეტისთვის პროცესში ხელისუფლების ჩართვას ითხოვენ.
ორსაათიანი უშედეგო ლოდინის შემდეგ, როცა აქციის მონაწილეებს აჭარის მთავრობაში არავინ შეხვდა, დაზარალებულებმა ქუჩა გადაკეტეს. პოლიციის ხელმძღვანელმა პირებმა აქციის მონაწილეებს უთხრეს, რომ ქუჩის გადაკეტვა სამართალდარღვევაა და შესაბამის ზომებს მიმართავენ.
„ახლა გავხდით დამნაშავე?“ – უთხრეს პოლიციელებს საპროტესტო აქციაზე შეკრებილებმა.
ბათუმში სხვადასხვა კომპანიისგან დაზარალდნენ მოქალაქეები. ისტორიები ერთმანეთს ჰგავს: წლების წინ ქალაქში ბინის აშენების იმედად ფული გადაიხადეს, მშენებლობა კი არ სრულდება, ან მშენებელი აღარ გამოდის კონტაქტზე. დაზარალებულები პერიოდულად მართავენ ბათუმში საპროტესტო აქციებს.
დღევანდელ საპროტესტო აქციაზე გამოსული მოქალაქეები კონკრეტულად დაუსრულებელ მშენებლობას აპროტესტებდნენ ბაგრატიონის 113-ში.
„ამდენი ხანია ვმართავთ აქციებს და არავინ ყურადღებას არ გვაქცევს: სად ვართ, როგორ ვცხოვრობთ,“ – გვიყვება მაგული შარაძე. 2017 წელს გაფორმებული ხელშეკრულების მიხედვით, მას ბაგრატიონის 113-ში უნდა ჩაჰბარებოდა ბინა ორ წელიწადში. კორპუსი ვერ აშენდა, ბინები კი, ახალ მესაკუთრეებზე გაიყიდა.
სასამართლოში წავედი, მაგრამ ვინ იცის, როდის დასრულდება დავა? ბინის ღირებულების დაახლოებით მესამედი გადახდილი მაქვს… ინვესტორი რამდენჯერმე შეიცვალა, ახლა ერთმანეთში ჩხუბობენ. ვითხოვთ, მთავრობამ აიღოს პასუხისმგებლობა.
ქუჩა მას შემდეგ გადავკეტეთ, როცა დღესაც ყურადღება არავინ მოგვაქცია. სულხან თამაზაშვილთან ვითხოვდით შეხვედრას. 2 საათი ვიდექით აჭარის მთავრობის სახლთან. ქუჩა რომ გადავკეტეთ, მერე გამოვიდა წარმომადგენელი,“ – ამბობს მაგული ფუტკარაძე.
სამოქალაქო ორგანიზაციის „ჩვენი უფლებებისთვის“ ხელმძღვანელი, თამაზ ბაკურიძე განმარტავს, რატომ არის ვალდებული მერია და მთავრობა მსგავს დავებში ჩაერიოს:
„აჭარის მთავრობის წარმომადგენელმა დღეს თქვა, განცხადებით მოგვმართეთო. წლებია ინფორმირებულია ყველა უწყება, თუმცა მოქალაქეებმა წარმომადგენელს უთხრეს, რომ მიმართავენ წერილობით და პასუხს დაელოდებიან. სხვადასხვა კომპანიის დაზარალებულები აპირებენ შეკავშირებას და ისე გამართავენ მასშტაბურ აქციას, თუ შედეგი არ დადგება…
როდესაც სისტემა არ მუშაობს, ზარალს ყოველთვის მოქალაქე იღებს. სანამ ეს არ შეიცვლება, დაუმთავრებელი მშენებლობები გაგრძელდება. ზედამხედველობის მექანიზმი ფაქტობრივად არ მუშაობს – მუნიციპალური ინსპექცია რეაგირებს უკვე მაშინ, როცა პრობლემა კრიტიკულ ფაზაშია – და არა მაშინ, როცა მისი პრევენცია შესაძლებელია.
ნებართვების გაცემის შემდეგ კონტროლი სუსტდება. სამშენებლო ნებართვის მიღება არ ნიშნავს, რომ პროექტი რეალურად დასრულდება, თუმცა სახელმწიფოს მხრიდან შემდგომი კონტროლი მინიმალურია. რისკები სრულად გადატანილია მოქალაქეზე და ხელშეკრულებებში პრაქტიკულად არ არსებობს ეფექტური მექანიზმი, რომელიც მოქალაქეს დაიცავს, ხოლო კომპანიების ფინანსური პასუხისმგებლობა ხშირად ფორმალურია. პოლიტიკური და არაფორმალური გავლენების ეჭვი მოქალაქეებში არსებობს განცდა, რომ გარკვეული პროექტები „დაცულია“, რაც აჩენს კითხვებს ზედამხედველობის მიუკერძოებლობაზე.
პასუხისმგებლობა უნდა განიხილებოდეს არა მხოლოდ ბიზნესის, არამედ ხელისუფლების დონეზე. დაუმთავრებელი კორპუსები ქმნის საფრთხეს ადამიანებისთვის ანტისანიტარულ გარემოს, ასევე კრიმინალის პოტენციურ კერებს,“ – ამბობს თამაზ ბაკურიძე.
ამ თემაზე:
მშენებარე ბინის მესაკუთრეები მერს დახმარებას სთხოვენ – აქცია ბათუმის მერიასთან
