ბათუმის მუნიციპალურმა ინსპექციამ შეაჩერა ბათუმში, ბაგრატიონის 131-ში მიმდინარე მშენებლობა. შესაბამის დადგენილება 2026 წლის პირველ სექტემბერს გამოიცა.
მოსახლეობა, რომელიც მშენებარე კორპუსის მოსაზღვრედ ცხოვრობს, ამბობს, რომ კომპანია მუნიციპალური ინსპექციის მითითებას არ ითვალისწინებს, და სამუშაოებს მაინც აგრძელებს. თუმცა თავად კომპანიაში ამას უარყოფენ და ამბობენ, რომ “ასრულებენ მხოლოდ იმ სამუშაოებს, რისი გამოსწორებაც მუნიციპალურმა ინსპექციამ დაავალათ”.
- რა ხდება
ბაგრატიონის 131-ში მრავალსართულიან საცხოვრებელ კომპლექსს კომპანია „ელლე ბაი ბაგრატიონი“ აშენებს.
მშენებარე კორპუსი ბაგრატიონის 129ა-ში არსებულ მრავალსართულიან კორპუსს ესაზღვრება, სადაც მოსახლეობა ცხოვრობს.
ერთ-ერთი ბოლო საპროტესტო აქცია ბაგრატიონის 129ა-ს მცხოვრებლებმა 2 სექტემბერს გამართეს და მშენებლებისგან უსაფრთხოების გარანტიები მოითხოვეს.
საქმე ისაა, რომ ახალი კორპუსის საძირკვლის სამუშაოების დროს ჩაინგრა უკვე აშენებული კორპუსის ეზო.
ბაგრატიონის 129ა-ში მცხოვრებლები შიშობენ, რომ მათი ცხოვრება იქ უსაფრთხო აღარაა.
ადგილობრივების თქმით, მათ არაერთგზის გამოიძახეს ბათუმის მუნიციპალური ინსპექცია, 2 სექტემბერს კი მიიღეს დოკუმენტი, რომლის თანახმადაც სამუშაოები უნდა შეჩერებულიყო.
„საქმისწარმოების პროცესში, 2026 წლის 01 სექტემბერს „ბათუმის მუნიციპალური ინსპექციის“ მიერ გამოიცა დადგენილება „სამშენებლო სამართალდარღვევის ჩადენის გამო შპს „ელლე ბაი ბაგრატიონის“ მიერ სანებართვო პირობების დარღვევით მიმდინარე მშენებლობის შეჩერების თაობაზე.
აღნიშნული დადგენილებით „ელლე ბაი ბაგრატიონი“ დავალდებულდა შეეჩერებინა ბათუმში, პეტრე ბაგრატიონის ქუჩა #131-ში მიწის ნაკვეთზე სანებართვო პირობების დარღვევით მიმდინარე მშენებლობა“, – ნათქვამია ბათუმის მუნიციპალური ინსპექციის დირექტორის, დავით მჭედლიძის მიერ ხელმოწერილ დადგენილებაში.
ბაგრატიონის 129ა-ში მცხოვრებთა თქმით, ამ დადგენილების მიუხედავად, დღეს, 3 და 4 სექტემბერს „ელლე ბაი ბაგრატიონი“ ჩვეულ რიტმში აგრძელებდა მუშაობას.
„ბოლო ორი დღე შეუსვენებლივ მუშაობდნენ. ამ წუთებშიც მიმდინარეობს მშენებლობა. მუნიციპალურში ვრეკავთ და არ გვპასუხობს“, – მოგვწერა ბაგრატიონის 129ა-ში მცხოვრებმა ერთ-ერთმა მოქალაქემ.
„ბათუმელები“ კომენტარისთვის დაუკავშირდა კომპანია „ელლე ბაი ბაგრატიონს“ და ჰკითხა, რა სახის სამუშაოები მიმდინარეობდა მაშინ, როცა არსებობს მუნიციპალური ინსპექციის დადგენილება მშენებლობის შეჩერების შესახებ.
„ბათუმის მუნიციპალურმა ინსპექციამ რა დადგენილებაც გამოსცა და რისი გამოსწორებისკენაც მიგვითითა, ამჟამად მიმდინარეობს სწორედ ამ დადგენილების შესაბამისი გამაგრებითი სამუშაოები.
მარტივად – მუნიციპალურმა რა მოთხოვნებიც წამოგვიყენა, ეგ რომ შევასრულოთ, ამისათვის შესაბამისი სამუშაოებია ჩასატარებელი.
ეს სამუშაოები კანონის ფარგლებშია, ყველაფერს ვაკეთებთ და მუნიციპალურიც საქმის კურსშია. მოდიან, აკვირდებიან სამუშაო პროცესს, თუ რა კეთდება და როგორ.
ასურათებენ, ვიდეოებს იღებენ, ყოველდღიურ რეჟიმში ხდება ეს და ჩვენც მაქსიმალურად ვცდილობთ შევასრულოთ მათი მოთხოვნა,“ – ასე განმარტავს „ელლე ბაი ბაგრატიონის“ წარმომადგენელი „ბათუმელებთან“ თუ რა სამუშაოები მიმდინარეობს ბაგრატიონის 131-ში ამჟამად.
“ბათუმელებმა” კითხვით მიმართა ბათუმის მერიასაც.
ბათუმის მერიის ინფორმაციით, ობიექტზე დაზიანებული ღობის აღდგენა მიმდინარეობს, ხოლო სამშენებლო სამუშაოები შეჩერებულია.
