საქართველოს პროკურატურის ინფორმაციით, ბათუმში ყაჩაღობის ფაქტზე დაკავებული ბათუმის მესამე განყოფილების უფროსი დეტექტივია. ინფორმაცია პოლიციელის მხრიდან რამდენიმე დღის წინ ჩადენილ ყაჩაღობაზე პროკურატურამ დღეს, 2026 წლის 9 მარტს, ამ ამბის მედიაში გაშუქების შემდეგ გაავრცელა.
გამოძიების ვერსიით, „ბრალდებული თანხის მართლსაწინააღმდეგო მისაკუთრების მიზნით, ბათუმში, თაბუკაშვილის ქუჩაზე მდებარე სასურსათო მაღაზიაში საკანცელარიო დანის გამოყენებით თავს დაესხა მენეჯერს და სიცოცხლისთვის საშიში ძალადობის მუქარით გაიტაცა 2 915 ლარი.
ბრალდებული შემთხვევის ადგილზე მისულ სამართალდამცველებს თვითონ ჩაბარდა და დანაშაული აღიარა. დაკავებულს ბრალდება საქართველოს სისხლის სამართლის კოდექსის 179-ე მუხლის პირველი ნაწილით [ყაჩაღობა] წარედგინა, რაც სასჯელის სახედ და ზომად 7 წლამდე თავისუფლების აღკვეთას ითვალისწინებს,“ – აღნიშნულია პროკურატურის მიერ 9 მარტს გავრცელებულ ინფორმაციაში.
