დღეს, 17 თებერვალს, ბათუმის საქალაქო სასამართლოში მიმდინარე სასამართლო სხდომაზე ბათუმის საპროტესტო აქციების მონაწილემ, ციალა ქათამიძემ მოწმის სახით ბათუმის პოლიციის უფროსის, ირაკლი დგებუაძის დაკითხვა მოითხოვა, რაც შსს-ს წარმომადგენლებმა კატეგორიულად გააპროტესტეს.
შსს-ს წარმომადგენლების თქმით, გაუგებარია, რატომ უნდა დაიკითხოს „ვინმე ირაკლი დგებუაძე“, როცა მას ციალა ქათამიძე არ დაუკავებია და ამ საქმის მასალებში საერთოდ არ ჩანს.
ციალა ქათამიძე სამოქალაქო წინააღმდეგობის მოძრაობის დამფუძნებელია. იგი 2025 წლის 11 იანვარს დააკავეს საჯარო სივრცეში, ასფალტზე სტიკერის გაკვრისთვის – „იფიცება საქართველო“.
ციალა ქათამიძე უშუალოდ ბათუმის პოლიციის უფროსმა, ირაკლი დგებუაძემ დააკავა და ამის ვიდეოკადრიც არსებობს. მას ირაკლი დგებუაძე სახელით მიმართავს და ეუბნება, რომ სტიკერის გაკვრა ადმინისტრაციულ სამართალდარღვევათა კოდექსის 150-ე მუხლის დარღვევაა და აკავებს. ცნობისთვის – 150-ე მუხლით პირის დაკავების უფლება პოლიციელს არ აქვს.
ციალა ქათამიძის ოქმიც გაყალბებულია, ისევე როგორც მზია ამაღლობელის დაკავების ოქმი: ოქმის მიხედვით, ციალა ქათამიძე 173-ე მუხლის საფუძველზე დააკავეს, ის თითქოს პოლიციელებს აყენებდა შეურაცხყოფას, მაშინ, როცა ციალა ქათამიძის დაკავების კადრებში ჩანს, რომ ქათამიძე შეურაცხყოფას არ აყენებს პოლიციელებს და არც წინააღმდეგობას უწევს დაკავებისას.
ციალა ქათამიძის დამკავებლადაც შსს-ს სხვა პირი ჩაუწერია ოქმში და არა ბათუმის პოლიციის უფროსი, ირაკლი დგებუაძე, რომელმაც სინამდვილეში ციალა ქათამიძე დააკავა.
მოსამართლემ დასაშვებად მიიჩნია ეს ვიდეოჩანაწერი, თუმცა ირაკლი დგებუაძის გამოკითხვაზე შუამდგომლობა ღიად დატოვა. მოსამართლეს არ განუმარტავს, რატომ არ აკმაყოფილებს ის ბათუმის პოლიციის უფროსის გამოკითხვის მოთხოვნას, როცა მას სიყალბეში ამხელენ.
შემდეგი სასამართლო სხდომა 12 მარტს გაიმართება.
___________________
ფოტოზე: კადრები, თუ როგორ აკავებს ირაკლი დგებუაძე ციალა ქათამიძეს
