ხვალ, 13 დეკემბერს, ბათუმელი მეზღვაურები საპროტესტო მარშს აანონსებენ.
მარში 19:00 საათზე, ევროპის მოედნიდან დაიწყება.
„დავაფიქსიროთ ჩვენი პოზიცია, როგორც სხვა სფეროს წარმომადგენლები აკეთებენ ამას და ავირჩიოთ ნათელი და ევროპული მომავალი!
ბათუმი საზღვაო ქალაქია, სადაც 18 000 მეზღვაური ცხოვრობს, სწორედ ამიტომ მოგიწოდებთ, ხვალ, საღამოს 19:00 საათზე გამოვიდეთ ყველა მეზღვაური, მეზღვაურთა ოჯახის წევრები, საზღვაო სფეროში და დაწესებულებებში დასაქმებულები და ვაჩვენოთ ყველას ჩვენი არჩევანი, რადგან ჩვენთვის, როგორც ამ სფეროს წარმომადგენლებისთვის, მნიშვნელოვანია ევროპული გზა.
ჩვენ ყველაზე მეტად ვიცით, თუ რას ნიშნავს ევროპა და ევროპული პერსპექტივები, ჩვენ ყველაზე მეტად ვიცით, თუ რაოდენ რთულია ევროპის დახმარების, მათი გვერდში დგომის გარეშე დასაქმება წარმატებულ კომპანიებში.
ამისათვის არ უნდა ვიყოთ პასიურები და უნდა ვიაქტიუროთ, შემდეგ ეს ყველაფერი გვიან იქნება!“ – ვკითხულობთ ფეისბუქის ჯგუფში.
- რა ხდება?
საქართველოში მიმდინარეობს მასშტაბური პროტესტი, რომელმაც არა მარტო თბილისი, არამედ საქართველოს სხვა ქალაქებიც მოიცვა.
პროტესტი გამწვავდა 28 ნოემბერს ირაკლი კობახიძის განცხადების შემდეგ, რომ „ქართული ოცნება“ ევროკავშირში გაწევრიანების პროცესს 2028 წლის ბოლომდე აჩერებს.
28 ნოემბრიდან დღემდე ათასობით ადამიანი გამოდის საპროტესტო აქციებზე თბილისში, ბათუმსა და საქართველოს სხვა ქალაქებში. დაკავებულია და სასტიკად ნაცემი ასობით ადამიანი, მათ შორის, მედიის წარმომადგენლები, სახელოვნებო სივრცის წარმომადგენლები. არაიდენტიფიცირებადი პირები ჯგუფურად თავს ესხმიან ქუჩებში მოქალაქეებსა და მედიის წარმომადგენლებს.
