წელს აჭარის კულტურული მემკვიდრეობის დაცვის სააგენტოს ინიციატივითა და განათლების, კულტურისა და სპორტის სამინისტროს მხარდაჭერით, ხინოწმინდის ეკლესიის რეაბილიტაცია დაიწყო. ტაძრის რეაბილიტაცაზე მუშაობს ტენდერში გამარჯვებული „სამშენებლო სარესტავრაციო კომპანია“.
აღდგენითი სამუშაოებისთვის ბიუჯეტიდან 99 ათასი ლარი დაიხარჯება.
ხინოწმინდის ეკლესია მდებარეობს მდინარე კინტრიშის ხეობაში, ქობულეთიდან 45 კმ-ის დაშორებით. ეკლესია, სავარაუდოდ, IX საუკუნეშია აშენებული. ისტორიული ცნობები ხინოს შესახებ პირველად ვახუშტი ბატონიშვილთან გვხვდება.
ხინოწმინდის საეპისკოპოსოს დაარსების შესახებ ორი მოსაზრება არსებობს: სიმონ ჯანაშიას მოსაზრების თანახმად მე-9 საუკუნეში პეტრას ბერძნული საეპისკოპოსოს გაუქმების შემდგომ, მაშინ, როდესაც აფხაზეთის სამეფო გაძლიერდა და ბიზანტიური გავლენა შესუსტდა, საეპისკოპოსო ცენტრი პეტრადან ხინოწმინდაში უნდა გადმოეტანათ, თუმცა, ამ ფაქტის დამადასტურებელი არანაირი ისტორიული საბუთი შემორჩენილი არ არის. მე-17 საუკუნის მეორე ნახევრამდე წყაროებში აქ მოღვაწე მღვდელმთავართა სახელებიც კი არ არის შემორჩენილი. პირველი ხინოწმინდელი ეპისკოპოსი, რომლის სახელმაც ჩვენამდე მოაღწია არის მაქსიმე I.
ეკლესია, სავარაუდოდ, აშენებულია IX საუკუნეში
ტაძარი მე-18 საუკუნეში ოსმალების შემოსვლის შემდგომ უნდა დანგრეულიყო, ნაწილობრივ დანგრეულ ეკლესიას მე-19 საუკუნის 70-იან წლებში მიწისძვრა დაემატა. ასეთ მდგომარეობაში მოვიდა ტაძარი მე-20 საუკუნის დასაწყისამდე, თუმცა არც ამის შემდგომ დასრულებულა ტაძრის ნგრევა.
ტაძარი მე-18 საუკუნეში, სავარაუდოდ, ოსმალების შემოსვლის შემდგომ დაინგრა
ადგილობრივ მოსახლეს, ემილ ტარიელაძეს ტაძრის ნარჩენებისგან ქვის სახლის აშენება უნდოდა. მართალია, მან ვერ შეძლო ეკლესიის სამშენებლო მასალით სახლის აგება, თუმცა მოახერხა ტაძრის მდგომარეობის კიდევ უფრო გაუარესება.
