„ბათუმელების“ ინფორმაციით პარტია „ერთიანი ნაციონალური მოძრაობა“ ქედის გამგებლის თანამდებობაზე უმაღლესი საბჭოს ყოფილი წევრისა და ქედის ყოფილი გამგებლის, ირაკლი ბარამიძის კანდიდატურას განიხილავს. პარტიის ქედის ორგანიზაციის თავმჯდომარის ვაჟა ბოლქვაძის ინფორმაციით, საბოლოო გადაწყვეტილება შვიდ სექტემბერს გახდება ცნობილი.
„ერთიან ნაციონალურ მოძრაობას“ ქედის საკრებულოში წარსადგენად ამ დროისთვის მხოლოდ მაჟორიტარი კანდიდატების ვინაობა აქვს დაზუსტებული. პარტია დაბა ქედის მაჟორიტარულ ოლქში კანდიდატად ქედის საკრებულოს ყოფილ თავმჯდომარეს, ბადრი დიასამიძეს წარადგენს, მახუნცეთის თემში – რემზი ბეჟანიძეს, პირველ მაისში – ნუგზარ გოგუაძეს, ოქტომბერში – ნოდარ ჩხიკვაძეს, მერისში, წინა მოწვევის ქედის საკრებულოს თავმჯდომარის მოადგილეს – ჯემალ შარაძეს, ზვარეში – ზაურ ჯაბნიძეს, წონიარსში – ქედის მოქმედ საკრებულოს წევრსა და ირაკლი ბარამიძის ძმას, ბაქარ ბარამიძეს, ცხმორისში – ევგენი დუმბაძეს და დანდალოს მაჟორიტარულ ოლქში – ბადრი ბალაძეს.
ვაჟა ბოლქვაძის თქმით, მაჟორიტარი კანდიდატების შერჩევისას პარტიამ აქცენტი კადრების კვალიფიციურობასა და საზოგადოებაში მათ ცნობადობაზე გააკეთა, პარტიული ორგანიზაციის თავმჯდომარე აქვე იმასაც დასძენს, რომ მათ „კარგი წარსული აქვთ“.
თვითმართველობის არჩევნებზე ქედაში, ნაციონალური მოძრაობის პარტიული სიით, პირველი ნომერი ვაჟა ბოლქვაძეა, პარტიულ სიაში ბაქარ ბარამიძის, რამინ ბერიძის, წინა მოწვევის ქედის საკრებულოს წევრის – რამაზ დუმბაძის, ირაკლი ბარამიძის, ბადრი დიასამიძის, რუსუდან ბასილაძის, ბადრი ბალაძის, ნატო შაინიძისა და ლელა აბულაძის კანდიდატურები მოიაზრება.
„ყველა პროფესიონალია, გამოცდილების მქონე ადამიანები არიან და კარგი წარსულიც აქვთ. რაც შეეხება პარტიულ სიას, ამ დროისთვის პარტიული სია დაზუსტებული და საბოლოო არ არის, თუმცა სიით პირველი კანდიდატი – ამ შემთხვევაში ჩემი კანდიდატურა არ შეიცვლება“ – აცხადებს ვაჟა ბოლქვაძე.
