ნეტგაზეთი • RU

„ბათუმის ავტოტრანსპორტი“ სადისპეტჩერო შენობის რეკონსტრუქციას გეგმავს

ბათუმის მერიის შპს „ბათუმის ავტოტრანსპორტი“, სადისპეტჩერო შენობის რეკონსტრუქციას გეგმავს და სამშენებლო სამუშაოებისთვის 28 325 ლარი აქვს გათვალისწინებული.

ბათუმი, სულხან-საბა ორბელიანოს №13-ში მდებარე შენობის სარემონტო სამუშაოებს „ბათუმის ავტოტრანსპორტი“ გამარტივებული ელექტრონული ტენდერით შეისყიდის, სადაც წინადადებების მიღება მიმდინარე წლის 12 ივლისს დაიწყება და 14 ივლისს დასრულდება.

სამშენებლო სამუშაოები უნდა განხორციელდეს ხელშეკრულების გაფორმებიდან არაუგვიანეს 2 თვის განმავლობაში. სატენდერო პირობების თანახმად, „სამუშაობების მიმდინარეობა უნდა განხორციელდეს, ისე, რომ ხელი არ შეუშალოს სადისპეტჩეროში არსებულ მუშა პროცესს [მძღოლებისა და კონდუქტორების რეგისტრაციას და ბილეთების აღებას]“. შესრულებული სამუშაოს საგარანტიო ვადა 2 წელია.

„ბათუმის ავტოტრანსპორტის“ სადისპეტჩერო შენობა / ფოტომასალა სატენდერო დოკუმენტაციიდან

„ბათუმის ავტოტრანსპორტის“ სადისპეტჩერო შენობა / ფოტომასალა სატენდერო დოკუმენტაციიდან

„ბათუმის ავტობუსების პროექტის“ ფარგლებში, დაგეგმილია ქალაქისთვის 10 ელექტრო და 20 დიზელზე მომუშავე ახალი ავტობუსის შეძენაც, რაც ძველი მუნიციპალური ავტობუსების ჩასანაცვლებლად საკმარისი არ არის.

„ბათუმის ავტოტრანსპორტის“ ინფორმაციით, ბათუმში, 16 სამარშრუტო ხაზზე ყოველდღიურად 107 ავტობუსი მოძრაობს, მწყობრში კი სულ 130 ავტობუსია [ამას ემატება 6 ავტობუსი, რომლებიც ქალაქგარეთ მოძრაობს].

ნეტგაზეთის მასალების სხვა გამოცემებში გადაბეჭდვის წესი
ავტორი
თედო ჯორბენაძე, ჟურნალისტი მობ.: 599 139 412 ელ/ფოსტა: tedobatumi@gmail.com