ბათუმის საკრებულომ რიგგარეშე სხდომაზე გადაწყვიტა ქალაქში, ღამის საათებში ფეიერვერკებისა და სხვა მსგავსი საშუალებების აფეთქება აკრძალოს. გადაწყვეტილების მიხედვით, ფეიერვერკის გამოყენების უფლება საღამოს 11:00 საათიდან დილის შვიდ საათამდე კერძო და იურიდიულ პირებს აღარ აქვთ. ღამის 11 საათის შემდეგ ფეიერვერკს მხოლოდ სახელმწიფოსთვის მნიშვნელოვანი მოვლენების აღსანიშნავ დღეებში, მერიასთან წინასწარი შეთანხმებით გაისვრიან. გადაწყვეტილების დამრღვევი პირი დაჯარიმდება. ვინ და როგორ განახორციელებს ფოიერვერკებზე ზედამხედველობას? ამ საკითხზე “ბათუმელებთან” საკრებულოს იურისტმა სულიკო შვენთიძემ ისაუბრა.
ბატონო სულიკო, როგორც ვიცით, ეს საკითხი საკრებულოს იურიდიულმა სამსახურმა დაამუშავა. ვინ უნდა განახორციელოს ფეიერვერკის გამოყენებაზე მონიტორინგი და როგორ?
დებულებაში გაწერილია, თუ ვის აქვს დაჯარიმების უფლება _ გარემოს დაცვის დეპარტამენტს აქვს მონიტორინგის ვალდებულება და თუ როგორ განახორციელებს ამას, ეს მისი სამუშაოა. დებულებაში ეს საკითხი გაწერილი არ არის. თუ გაისვრიან ფეიერვერკს ქორწილში, დაჯარიმდება ქორწილის ორგანიზატორი, თუ საცხოვრებელი სახლებიდან გაისვრიან, მოხდება მოკვლევა. უნდა დაადგინონ დეტალები, თუ ვინ გამოიყენა და ა.შ. გადაწყვეტილებაში იმის შესახებ წერია, თუ რომელ საათებშია აკრძალული და რა არის გამონაკლისი შემთხვევა.
რა ითვლება გამონაკლისად?
საახალწლო დღეები და განსაკუთრებული შემთხვევები, მაგალითად, კონცერტები მერიის წინასწარი წერილობითი თანხმობით.
ქორწილის შემთხვევაში დასჭირდებათ წინასწარი თანხმობა?
ქორწილი არ არის განსაკუთრებული შემთხვევა, ასეთ რამეებზე არ ხდება ნებართვის გაცემა. განსაკუთრებულია ის, რაც საზოგადოებრივია და მნიშვნელოვანი. ვთქვათ, ჩამოდის მაღალი რანგის სტუმარი უცხოეთიდან და ა.შ. კერძო პირებს მხოლოდ საღამოს თერთმეტ საათამდე აქვთ ფეიერვერკის გამოყენების უფლება, შემდეგ უკვე ამოქმედდება ჯარიმები.
რამდენია ჯარიმა პირველ შემთხვევაზე და განმეორების შემთხვევაში რამდენი იქნება?
500 ლარია პირველ ფაქტზე, განმეორების შემთხვევაში კი _ 1000 ლარი.
გადაწყვეტილება უკვე ძალაშია თუ მოსახლეობას აქვს დრო, ინფორმაციის მისაღებად?
რეგულაცია უკვე ამოქმედებულია, პირველი ივლისიდან უკვე ძალაშია. არცოდნა პირს არ ათავისუფლებს პასუხისმგებლობისგან.
დოკუმენტში წერია, რომ მერიის ზედამხედველობის სამსახურმა, გარემოს ზედამხედველობის დეპარტამენტს, კანონდარღვევის შემთხვევაში, უნდა გაუწიოს ტექნიკური დახმარება. რა იგულისხმება ამაში?
ტექნიკურ დახმარებაში იგულისხმება ის, რომ თუ ფაქტს დააფიქსირებს მერიის ზედამხედველობის სამსახური, ამ ინფორმაციას გადასცემს გარემოს ზედამხედველობის სამსახურს. დანარჩენ დეტალებზე თვითონ სამსახურმა უნდა იმსჯელოს.
რითი იყო ამ გადაწყვეტილების მიღება გამოწვეული?
ბევრი უკმაყოფილება იყო მოსახლეობის მხრიდან, რომ ღამის საათებში აფეთქებდნენ და ხმაური არ აძლევდა ადამიანებს ძილის საშუალებას.
გარემოს ზედამხედველობის სამსახური ჯერ არ არის ამ გადაწყვეტილების შესახებ ბოლომდე ინფორმირებული, როდის გადაეგზავნებათ მათ დოკუმენტი?
გადაწყვეტილება მიღებული და ხელმოწერილია, მალე გადაეგზავნებათ.
