2017 წლის დასაწყისიდანვე აჭარის მთავრობის თავმჯდომარემ დააანონსა, რომ წელს აჭარაში ერთ-ერთი ყველაზე მნიშვნელოვანი, ინფრასტრუქტურული პროექტების განხორციელება იქნებოდა. განსაკუთრებული ყურადღება კი მუნიციპალურ და შიდა სასოფლო გზების მოწესრიგებას, გამაგრებას დაეთმობოდა. მიმდინარე წელს მხოლოდ ხელვაჩაურის მუნიციპალიტეტში 27კმ-მდე ასფალტბეტონის საფარის და 53 ერთეული ხელოვნური ნაგებობის მოწყობაა დაგეგმილი.
ყველა მუნიციპალიტეტში ერთდროულად მიმდინარეობს რამდენიმე ათეული პროექტი. ამჯერად მხოლოდ მათ მცირე ნაწილზე, ხელვაჩაურის მუნიციპალიტეტში, აპრილში განხორციელებულ თუ მიმდინარე იმ პროექტებზე მოგაწვდით ინფორმაციას, რომლებსაც აჭარის ავტონომიური რესპუბლიკის საავტომობილო გზებისა და სამელიორაციო სისტემების მართვის დეპარტამენტი ახორციელებს უშუალოდ ან ზედამხედველობს.
27 აპრილს ხელვაჩაურის მუნიციპალიტეტში ერთდროულად რამდენიმე სოფელში დასრულდა ინფრასტრუქტურული პროექტი: სოფელ ჭარნალში საავტომობილო გზის და ჭარნალის ხიდის მონაკვეთები და მახო-დავითაძეების, მახოს გზა-სიმონეთის მიმართულებით. ამ მიმართულებებზე სამუშაოებს დეპარტამენტის მიერ გამოცხადებულ ტენდერში გამარჯვებული კომპანიები ასრულებდნენ. სამუშაოების განსახორციელებლად აჭარის ა/რ ბიუჯეტით გათვალისწინებული იყო 78 522 ლარი.
აღნიშნული სამუშაოებით გაფართოვდა გზის სავალი ნაწილი, გამაგრდა გზის მონაკვეთების ზედა და ქვედა საყრდენი კედლები, რაც ტრანსპორტის უსაფრთხო გადაადგილებას უზრუნველყოფს.
ასევე ხელვაჩაურის მუნიციპალიტეტში საყრდენი კედლები მოეწყობა საავტომობილო გზების მონაკვეთებზე: მახინჯაური-მიქელაძეების, მახინჯაური-გოგირდის აბანოები-ზედა განთიადის, ჭოროხის ხიდი-მახო-ზანაქედი, განთიადი-ზედა განთიადი, კაპრეშუმი-განთიადი. ამ მიმართულებებზე სამუშაოებს დეპარტამენტის მიერ გამოცხადებულ ტენდერში გამარჯვებული კომპანია შპს „გიგა 2015“ ასრულებს და მათ განსახორციელებლად აჭარის არ ბიუჯეტით გათვალისწინებულია 64176 ლარი; ომბოლოს გზის მონაკვეთზე სამუშაოები შპს „ნიამ“ შეასრულა, რომლის ღირებულებამ 15 571 ლარი შეადგინა; 31 დეკემბრის ქუჩა-ფერია-მნათობი, საყოფაცხოვრებო მანქანების ქარხანა-ჩელტა, ფერია-ესელიძეები (შარაძის სახლი) – აღნიშნულ მონაკვეთებზე გზების კეთილმოწყობა კი შპს „გორა+“-მა განახორციელა. სამუშაოებისთვის ბიუჯეტიდან 15 209 ლარი იყო გამოყოფილი.
აჭარის ა/რ საავტომობილო გზებისა და სამელიორაციო სისტემების მართვის დეპარტამენტის უფროსი არჩილ ჩიქოვანი თანამშრომლებთან ერთად უშუალოდ აკონტროლებს და ზედამხედველობს პროექტების მიმდინარეობას. მიმდინარე წლის 18 აპრილს ის მოადგილეებთან ერთად ადგილზე გაეცნო ხელვაჩაურის მუნიციპალიტეტში კირნათი-ჩხუტუნეთის საავტომობილო გზაზე ბეტონის საფარის მოწყობის სამუშაოებს და აღნიშნული პროექტის მიმდინარეობის შესახებ ინფორმაცია ხელვაჩაურის მუნიციპალიტეტის წარმომადგენელებისგან მიიღო. სამუშაოები დეპარტამენტის ქვეპროგრამის – „საგზაო და სამელიორაციო ინფრასტრუქტურის მოვლა-შენახვის“ ფარგლებში ხორციელდება. ღონისძიება ითვალისწინებს დაზიანებული 1200 მეტრი სიგრძის საავტომობილო გზის ბეტონის საფარით მოწყობას.
