ქობულეთის სოფელ აჭყვისთავში უგზოობაზე წუხან. იმის მიუხედავად, რომ „ქართული ოცნება“ სოფლებში გზების მოწესრიგებაზე საუბრობს, ამ სოფელში გზა უკვე 4 თვეა ვერ გააკეთეს.
სოფელ აჭყვისთავში მცხოვრები კახა ნოღაიდელი ამბობს, რომ გზაზე ავტომანქანით გავლა 2024 წლის დეკემბრიდან გახდა შეუძლებელი, მას შემდეგ, როცა იქ ხელისუფლების მიერ დაქირავებულმა კომპანიამ სარემონტო სამუშაოები დაიწყო. დეკემბრის შემდეგ აქ არ გამოჩენილანო, გვიყვება მოქალაქე, ქობულეთის მერიის პრესცენტრის განმარტებით კი, სამუშაოები „ამინდების გამო ვერ დასრულდა“.
დამეწყრილი გზა ქობულეთის სოფელ აჭყვისთავში
„გასული წლის ოქტომბერში გაჩნდა ნაპრალი, ჯერ კიდევ ფუნქციონირებდა გზა, სანამ სარემონტო სამუშაოებს დაიწყებდნენ, მერე მოვიდნენ და მთლად ჩამოშალეს მოშვებული გრუნტი,“ – – გვიყვება კახა ნოღაიდელი.
ამ გზით სოფელ აჭყვისთავში მინიმუმ 20 ოჯახი სარგებლობს. პრობლემას ართულებს ისიც, რომ ამ სოფლის სკოლაში სარემონტო სამუშაოებია. ბავშვები მეზობელი სოფლის – ალამბრის სკოლაში დადიან, ტრანსპორტი კი, რომელსაც მოსწავლეები სკოლამდე მიჰყავს, ყველა ბავშვის სახლამდე ვერ მიდის.
„სკოლის მარშუტკაც ვერ ადის და ბავშვები ფეხით გადმოდიან,“ – ამბობს კახა ნოღაიდელი და განმარტავს, რომ ბავშვები უკვე თვეებია ფეხით გადმოდიან იმ ადგილამდე, სადაც სკოლის ავტობუსი მიდის.
რამ შეუშალა ხელი სოფლის შიდა გზის მოწყობაში ქობულეთის მერიას? – ქობულეთის მერიის პრესცენტრში განმარტეს, რომ აჭარის საავტომობილო გზების დეპარტამენტი მუშაობს ამ გზაზე და უახლოეს დღეებში გაგრძელდება სამუშაო. „ამინდების გამო ვერ დასრულდა ამ დრომდე,“ – გვითხრეს ქობულეთის მერიის პრესცენტრში.
რაც შეეხება აჭარის გზების დეპარტამენტს, აქ ინფორმაციის მოწოდებას დაგვპირდნენ, თუმცა ჯერ-ჯერობით ინფორმაცია არ მიგვიღია. ინფორმაციის მიღების შემთხვევაში მასალა განახლდება.
განახლება: „აღნიშნულ მიმართულებაზე საავტომობილო გზის აღდგენის სამუშაოები დასკვნით ეტაპზეა. უკვე დასრულდა ხელოვნური ნაგებობის მშენებლობა, ხოლო დარჩენილი სამუშაოები უახლოეს რამდენიმე დღეში დამთავრდება“ – მოგვწერეს აჭარის გზების დეპარტამენტის პრესცენტრიდან.
