ბათუმში, 11 მარტის აქციის კიდევ ერთი მონაწილის, ნარიმან ლომინაძის საქმის განხილვა ახლახან დაასრულა მოსამართლე გოჩა ფუტკარაძემ ბათუმის საქალაქო სასამართლოში. მოსამართლემ მას ადმინისტრაციული სამართალდარღვევა არ დაუდგინა.
ნარიმან ლომინაძე
ნარიმან ლომინაძე თეთრიწყაროს მუნიციპალიტეტში, სოფელ წინწყაროში ცხოვრობს. გუშინ მან მოსამართლეს მოუყვა, რომ ეკომიგრანტია და 12 მარტს დილით შუახევში, სოფელ ჭვანაში მიდიოდა, სადაც მისი ნათესავები ცხოვრობენ. მისი თქმით, პოლიციელებმა მანქანიდან გადმოიყანეს და დააკავეს პოლიციის შენობასთან, სადაც იმ პერიოდში ჯერ კიდევ ხალხმრავლობა იყო.
იმის გამო, რომ საზოგადოებრივი წესრიგის დარღვევასა და პოლიციელების შეურაცხყოფას გუშინ ოქმის შემდგენი პოლიციელის გარდა ვერავინ ადასტურებდა, მოსამართლე გოჩა ფუტკარაძემ საქმის განხილვა დღეისთვის გადადო.
დღეს მოსამართლეს ვერც ერთი მტკიცებულება მხარეებმა ვერ წარმოუდგინეს. პოლიციელმა სულიკო დევაძემ მოსამართლეს გაუმეორა, რომ მანქანიდან გადმოიყვანეს ნარიმანი, რადგან ის გაქცევას აპირებდა. „შესაბამისად ბატონი ნარიმანის ჩვენება ემთხვევა ჩემსას,“ – დაასკვნა პოლიციელმა.
„გასაქცევი კაცი ფეხით გეიქცეოდა, მანქანაში კი არ ჩაჯდებოდა“, – მიმართა პოლიციელს ნარიმან ლომინაძემ.
„თავისთავად აქციაზე ყოფნა ხულიგნობას არ ნიშნავს. შესაძლოა, ნარიმანმა დაარღვია საზოგადოებრივი წესრიგი, მაგრამ ამის დადასტურებას სჭირდება მტკიცებულებები“, – მიუთითა მოსამართლე გოჩა ფუტკარაძემ პოლიციელს გადაწყვეტილების სარეზოლუციო ნაწილის გამოცხადების შემდეგ და დარბაზიდან გავიდა.
ამავე თემაზე:
