ბათუმის მერიის ინფორმაციით, ხვალ, 8 მარტს, ფონდი „ქართუ“ ბათუმის სარაგბო ბაზას ქალაქის მერიას გადასცემს.
სარაგბო ბაზის გადაცემას ფონდი „ქართუს“ გამგეობის თავმჯდომარე ნიკოლოზ ჩხეტიანიც დაესწრება. ასევე, საქართველოს სპორტისა და ახალგაზრდობის საქმეთა მინისტრი ტარიელ ხეჩიკაშვილი, აჭარის მთავრობის თავმჯდომარე ზურაბ პატარაძე და ქალაქის მერი გიორგი ერმაკოვი.
ოფიციალური ინფორმაციით, ფონდი „ქართუს“ დაფინანსებით, ბათუმში, გენერალ აბაშიძისა და ლეონიძის ქუჩების მიმდებარედ, თანამედროვე სტანდარტების პირველი სარაგბო ბაზა აშენდა, რომელიც რაგბის ორ მოედანს აერთიანებს.
ბუნებრივსაფარიანი და ხელოვნურსაფარიანი სტანდარტული მოედნები 2484 და 500 მაყურებელზეა გათვლილი.
„სარაგბო კომპლექსში დამხმარე შენობები და ავტოსადგომი შედის. თანამედროვე სტანდარტების კომპლექსი ადაპტირებულია შშმ პირთათვის. სამშენებლო სამუშაოები ასოციაცია „ატუმ“ 2014 წელს დაიწყო.
სარაგბო ბაზის მშენებლობის მთლიანი ღირებულება 7 მილიონ 355 ათას 157 ლარს შეადგენს,“ -ნათქვამია ოფიციალურ განცხადებაში.
მერიის ინფორმაციით, სარაგბო ბაზის მშენებლობაზე 3 მილიონ 596 ათასი ლარი ქალაქის ბიუჯეტიდან დაიხარჯა.
„აჭარაში რაგბის სახეობა ბოლოს წლებში განსაკუთრებით პოპულარული გახდა. რეგიონის მასშტაბით, სხვადასხვა ასაკობრივ ჯგუფში წვრთნას 900-მდე სპორტსმენი გადის“.
ამავე თემაზე:
