ომის კვლევის ამერიკული ინსტიტუტი – ISW, რუსეთ-უკრაინის ომის 13 ნოემბრის მიმოხილვაში წერს, რომ კრემლი ცდილობს, აშშ-ში ტრამპის ადმინისტრაციის მოსვლამდე დააყენოს მოთხოვნები უკრაინასთან სამშვიდობო მოლაპარაკებისთვის.
„ის, რომ კრემლი ცდილობს მოლაპარაკებების პირობების დადგენას, მიანიშნებს, რომ რუსეთის მიზნები უცვლელი რჩება და კვლავ უკრაინის სრულ კაპიტულაციას უტოლდება“, – წერს ISW-ი ბოლო მიმოხილვაში.
ISW-ს მკვლევრების აზრით, კრემლი, როგორც ჩანს, არ არის მზად ტრამპის ახალ გუნდთან უფრო დიდი დათმობებისათვის, ვიდრე ეს ბაიდენის ადმინისტრაციის შემთხვევაში იყო.
ანალიტიკოსები მიუთითებენ რუსეთის საგარეო საქმეთა სამინისტროს სპიკერის, მარია ზახაროვას 13 ნოემბრის განცხადებაზე იმის შესახებ, რომ თითქოს „დასავლელი ოფიციალური პირები იტყუებიან, რომ ისინი ინტერესდებიან უკრაინაში მშვიდობით. ზახაროვას თქმით, მშვიდობის მიღწევა შესაძლებელია მხოლოდ მაშინ, როდესაც დასავლეთი შეწყვეტს უკრაინის სამხედრო დახმარებას.
ISW-ს თანახმად, ზახაროვას განცხადება იმაზე მიუთითებს, რომ რუსეთი აგრძელებს მტკიცებას – დასავლეთმა უნდა შეწყვიტოს უკრაინის სამხედრო დახმარება, როგორც სამშვიდობო მოლაპარაკებების წინაპირობა.
ანგარიშში ასევე მოყვანილია რუსეთის საგარეო საქმეთა მინისტრის, სერგეი ლავროვის 13 ნოემბრის განცხადება იმის შესახებ, რომ ტრამპის პრეზიდენტობა ძირეულად არ შეცვლის აშშ-ს პოზიციას უკრაინასთან დაკავშირებით და რომ ნებისმიერი წინადადება ფრონტის ხაზის გაყინვის შესახებ „კიდევ უარესია“, ვიდრე რუსეთისთვის ხელსაყრელი მინსკის შეთანხმება, რომელსაც მოჰყვა რუსეთის პირველი შეჭრა უკრაინაში 2014 წელს.
„ლავროვის უარყოფა ამჟამინდელი ფრონტის ხაზის გაყინვის პოტენციურ წინადადებაზე კიდევ უფრო მიუთითებს, რომ რუსეთი არ არის დაინტერესებული მოლაპარაკებებში მისი მიდგომისა და მოთხოვნების შერბილებით და ინარჩუნებს უკრაინის კაპიტულაციის მიზანს, რომელიც რუსეთის პრეზიდენტმა ვლადიმერ პუტინმა 2024 წლის ივნისში მკაფიოდ გამოაცხადა“, – ვკითხულობთ მიმოხილვაში.
