Batumelebi | აჭარის მთავრობა კანონპროექტს უმაღლეს საბჭოს უბრუნებს აჭარის მთავრობა კანონპროექტს უმაღლეს საბჭოს უბრუნებს – Batumelebi
RU | GE  

აჭარის მთავრობა კანონპროექტს უმაღლეს საბჭოს უბრუნებს

 

უსკოს დაკომპლექტების წესის შესახებ კანონპროექტი აჭარის უმაღლეს საბჭოს შენიშვნებით დაუბრუნდა. აჭარის მთავრობის იურიდიული დეპარტამენტის ხელმძღვანელი პარმენ ჯალაღონია იმ მიზეზებს განმარტავს, რის გამოც მთავრობის თავმჯდომარემ, არჩილ ხაბაძემ კანონპროექტს ხელი არ მოაწერა. 

„მთავრობის თავმჯდომარის მიერ გამოყენებული იქნა კონსტიტუციით მისთვის მინიჭებული უფლებამოსილება და უმაღლეს საბჭოს  მოტივირებული შენიშვნებით დაუბრუნდა კანონპროექტი. მოტივის ძირითადი საფუძველი იყო ის, რომ ჩვენი თვალთახედვით, დღეს მოქმედი საკანონმდებლო ნორმა უფრო მეტად დემოკრატიულია და იძლევა ასე ვთქვათ, საზოგადოების ფართო ჩართულობის შესაძლებლობას. დღეს მოქმედი ნორმით, უმაღლესი საარჩევნო კომისიის წევრობის კანდიდატი შეიძლება გახდეს ნებისმიერი პირი ვინც შესაბამისი განცხადებით მიმართავს შესაბამის კომისიას. ხოლო ახალი ნორმით ამის უფლება ქონდა მხოლოდ პოლიტიკურ პარტიებს და არასამთავრობო ორგანიზაციებს,“ – განაცხადა პარმენ ჯალაღონიამ. 

 

მისივე თქმით უმაღლეს საბჭოს აქვს უფლება 15 დღის ვადაში განიხილოს ეს შენიშვნები. 15 დღის შემდეგ თუ შენიშვნები გათვალისწინებული იქნება, კანონპროექტი ხელმოსაწერად  აჭარის ავტონომიური რესპუბლიკის თავმჯდომარეს დაუბრუნდება.  ამ შემთხვევაში კანონში ცვლილება არ შევა და  დარჩება ძალაში დღეს მოქმედი კანონის ნორმა. 

 

 ხოლო თუ კი უმაღლესი საბჭო შენიშვნებს არ გაითვალისწინებს  და კანონპროექტს უცვლელად დაუბრუნებს აჭარის მთავრობას, მთავრობის თავმჯდომარეს ხუთი დღე აქვს ხელმოსაწერად. თუმცა უმაღლესმა საბჭომ ვეტო რომ დასძლიოს, ამისათვის ხმათა 3/5-ია საჭირო.  იმ შემთხვევაში თუკი არჩილ ხაბაძე კანონპროექტს ხელს ისევ არ მოაწერს,  მაშინ კანონპროექტი უმაღლეს საბჭოს დაუბრუნდება, მას ხელს უმაღლესი საბჭოს თავმჯდომარე ავთანდილ ბერიძე მოაწერს  და ძალაში შევა. 

 

აჭარის მთავრობის პრესსამსახურის მიერ დღეს გავრცელებულ პრესრელიზში წერია, რომ „შესაბამისი გადაწყვეტილება მთავრობის თავმჯდომარემ არასამთავრობო ორგანი­ზა­ცი­ე­ბის წარმომად­გენ­ლებთნ, უმაღლესი საბჭოს წევრებთან და საქართ­ვე­ლოს პარლამენტის თავმჯდო­მა­რესთან კონსულტაციების შემდეგ მიიღო“. 

ნეტგაზეთის მასალების სხვა გამოცემებში გადაბეჭდვის წესი
"ბათუმელები"