Batumelebi | უნივერსიტეტი პროკურატურის პასუხს ელოდება უნივერსიტეტი პროკურატურის პასუხს ელოდება – Batumelebi
RU | GE  

უნივერსიტეტი პროკურატურის პასუხს ელოდება


აპირებს თუ არა ბათუმის შოთა რუსთაველის უნივერსიტეტი ჩივილს 2007 წლის 8 ნოემბერს უნივერსიტეტის მშვიდობიანი აქციის დარბევასთან დაკავშირებით?  „თუ აღნიშნული ფაქტი არ იქნება გამოძიებული, უნივერსიტეტი ვერ მოიპოვებს ავტონომიურობას“, – ასე ფიქრობს გოჩა სურგულაძე. გოჩა სტუდენტური მოძრაობა „ალტერნატივას“ წევრია. „ალტერნატივას“ ერთ-ერთი მიზანი ამ ფაქტის გამოძიებაა: „მივმართეთ გენერალურ პროკურორს, არჩილ კბილაშვილს ამ ფაქტის გამოძიების თხოვნით. ყველა დამნაშავე უნდა დაისაჯოს, გამოძიება დაწყებული იყო ამ ფაქტთან დაკავშირებით, თუმცა ყველაფერი შეაჩერეს, სტუდენტები და ლექტორები იყვნენ დაშინებულები, ამიტომ საჭიროა ხელახლა დაიწყონ პროცესი“.

სტუდენტი ილო ურუშაძე ერთ-ერთი ინიციატორია. ისიც ფიქრობს, რომ უნივერსიტეტში 2007 წლის 8 ნოემბერს მომხდარი ფაქტი დანაშაულია და მისი გამოძიება ხელმეორედ უნდა დაიწყოს: „პროკურატურას „ალტერნატივის“ ინიციატივით გაეგზავნა თხოვნა, რომ აღნიშნული ფაქტი გამოიძიონ, თუმცა ეს იყო მთელი სტუდენტების ერთსულოვანი გადაწყვეტილება. დისკუსია გავმართეთ, რომელსაც ადმინისტრაციაც ესწრებოდა, ჩვენ ყველამ ერთად გადავწყვიტეთ, რომ ვუთხრათ არა ძალადობას. თხოვნა წინა სამშაბათს გავაგზავნეთ, პასუხს ველოდებით, მხოლოდ ამის შემდეგ გადავწყვეტთ, როგორ მოვიქცეთ. მე პირადად ძალიან მიკვირს, რომ თბილისში ამ ფაქტს არ ეხმაურებიან, ამის გამო გულნატკენი ვარ. ჩვენი უნივერსიტეტიც დუმილს ამჯობინებდა ამ თემასთან დაკავშირებით, ამის მიზეზი იყო ის რეჟიმი, რომელიც იყო ქვეყანაში. თუმცა იყვნენ ისეთი ლექტორებიც, რომლებიც ყოველთვის ეხმაურებოდნენ ამ ფაქტს“.

 

 

სტუდენტებს ეთანხმება უნივერსიტეტის რექტორი, ალეკო ბაკურიძეც: „მსგავსი რამ არსად მომხდარა, მაგრამ რომც მომხდარიყო, 8 ნოემბერს ჩვენს უნივერსიტეტში მომხდარ ფაქტს მაინც ვერ გაამართლებდა. უნივერსიტეტი არ არის ის ადგილი, სადაც ხელკეტებით უნდა შემოდიოდეს ვინმე, ეს აბსოლუტურად სხვა დაწესებულებაა და არავის აქვს უფლება, აქ ძალა გამოიყენოს. მომხდარ ფაქტს სამართლებრივი სახე უნდა მიეცეს, ყოველ 8 ნოემბერს არ უნდა ვიკრიბებოდეთ ამ თემების განხილვისთვის, ერთხელ და სამუდამოდ მას უნდა მიეცეს სამართლებრივი შეფასება, იყო თუ არა დანაშაული, აუცილებლად უნდა გაირკვეს“. რექტორი ამბობს, რომ სტუდენტურ ჯგუფ „ალტერნატივას“ მიერ გაგზავნილი მიმართვა პროკურატურისადმი ფაქტის გამოძიების თხოვნით უნივერსიტეტის პოზიციას გამოხატავს.

 

უნივერსიტეტის კანცლერი ედიშერ ჩავლეიშვილი ფიქრობს, რომ თუ ძალა გადამეტებული იყო, დამნაშავეები უნდა დაისაჯონ: „ვისაც ზარალი მიადგა, ყველამ უნდა იჩივლოს. უნივერსიტეტი არ დაზიანებულა მატერიალურად, მატერიალურ-ტექნიკური ბაზა არ დამტვრეულა…  კი, მორალური ზარალი მიიღო, მაგრამ ამაზე როგორ უნდა იჩივლოს? შესულია უკვე წერილობით თხოვნა, სხვანაირად როგორ უნდა იჩივლოს, მე ვერ ვხედავ აქ რაღაც წინააღმდეგობას, ნამდვილად უნდა დაისაჯოს ყველა ის პირი, ვინც გადაამეტა თავის უფლებამოსილებას. ეს ფაქტი თავისთავად უნდა იქნეს გამოძიებული“.

 

2007 წლის 8 ნოემბერს ბათუმის უნივერსიტეტის სტუდენტები დაარბიეს – სპეცდანიშნულების რაზმი უნივერსიტეტში შეიჭრა და მხუთავი გაზი გაუშვა. ამ დარბევის ერთ-ერთი ხელმძღვანელი დავით ბედია – შს სამინისტროს აჭარის სამმართველოს მაშინდელი უფროსი, ცოტა ხნის წინ შს სამინისტროს კრიმინალური პოლიციის უფროსად დანიშნეს. ირაკლი ღარიბაშვილის თქმით, `ბედია არის პროფესიონალი პოლიციელი, ის თავისი საქმის ძალიან კარგი სპეციალისტია“.     

 

ნეტგაზეთის მასალების სხვა გამოცემებში გადაბეჭდვის წესი
Nana Kvachadze