რატომ შეცვალეს დანიშვნიდან ორ კვირაში აჭარის პროექტების მართვის კომპანიის დირექტორი

აჭარის პროექტების მართვის კომპანიის დირექტორად ლევან კვანტალიანი დანიშნეს. აჭარის ფინანსთა და ეკონომიკის სამინისტროს ინფორმაციით, ლევან კვანტალიანი პროფესიით ფინანსისტია და ამ დრომდე საქართველოს ფინანსთა სამინისტროს საფინანსო-ანალიტიკურ სამსახურში ფინანსური მენეჯერის პოზიციაზე მუშაობდა.

ყოფილი დირექტორი გოჩა გაბრუშიძე კი პირველ მოადგილედ გადაიყვანეს.

ინფორმაცია აჭარის პროექტების მართვის კომპანიის დირექტორად ლევან კვანტალიანის დანიშვნის შესახებ აჭარის ფინანსთა და ეკონომიკის სამინისტრომ ფეისბუქის გვერდზე გამოაქვეყნა, იქვე წერენ, რომ გოჩა გაბრუშიძე, რომელიც დირექტორის თანამდებობაზე ფინანსთა მინისტრმა 2026 წლის 21 იანვრის ბრძანებით დირექტორად დანიშნა, დირექტორი არ იყო და მოვალეობას ასრულებდა, თუმცა დოკუმენტების მიხედვით ასე არ არის.

სქრინი სამინისტროს ფეისბუქის გვერდიდან

აჭარის ფინანსთა და ეკონომიკის მინისტრის, ედნარ ნატარიძის ბრძანებაში გარკვევით წერია, რომ 2026 წლის 21 იანვარს კომპანიის იურისტი გოჩა გაბრუშიძე აჭარის პროექტების მართვის კომპანიის დირექტორად დაინიშნა, ყოფილი ხელმძღვანელი, ბაქარ ჩიტაია კი თანამდებობიდან გაათავისუფლეს.

ამონარიდი მინისტრის 2026 წლის 21 იანვრის ბრძანებიდან

აჭარის პროექტების მართვის კომპანიის დირექტორად ლევან კვანტალიანის დანიშვნის შესახებ ბრძანებაში, რომელიც 2026 წლის 3 თებერვლით თარიღდება, ასევე ვკითხულობთ, რომ ორი კვირის წინ იმავე თანამდებობაზე დანიშნული გოჩა გაბრუშიძე თანამდებობიდან პირადი განცხადების საფუძველზე გაათავისუფლეს.

საინტერესოა, რატომ წერს სამინისტრო, რომ ის თითქოს მოვალეობის შემსრულებელი იყო, იმიტომ ხომ არა, რომ ლევან კვანტალიანის დანიშვნის შესახებ დირექტივა თბილისიდან მოვიდა?

აჭარის პროექტების მართვის კომპანია აჭარის მთავრობის მიერ დაფუძნებული ორგანიზაციაა. კომპანია აჭარის ფინანსთა და ეკონომიკის სამინისტროს ექვემდებარება და მაღალბიუჯეტიანი საპროექტო-სამშენებლო პროექტების შესყიდვა- განხორციელებაზე მუშაობს.

დოკუმენტების მიხედვით, კომპანიის ყოფილმა ხელმძღვანელმა, ბაქარ ჩიტაიამ თანამდებობა საკუთარი განცხადების საფუძველზე დატოვა – ის ბათუმის მერიაში გადავიდა სამუშაოდ. შემდეგ დირექტორად გოჩა გაბრუშიძე დანიშნეს, რომელიც 14 დღეში ასევე პირადი განცხადების საფუძველზე გაათავისუფლეს და ლევან კვანტალიანი დანიშნეს. ფოტო: აჭარის ფინანასთა და ეკონომიკის სამინისტრო.