დღეს, 4 აპრილს, 15:00 საათზე, ბათუმში, ევროპის მოედანზე, მიუსაფარ ცხოველთა უფლებების დასაცავად აქცია გაიმართება.
“მაშინ კი არ ხარ ძლიერი, როცა უსამართლობაზე თვალს ხუჭავ – მაშინ ხარ, როცა მის წინააღმდეგ დგახარ. თუ ერთხელ მაინც ჩაგიხედავთ ძაღლისთვის თვალებში, ერთხელ მაინც გადაგისვამთ თავზე ხელი მაშინ ის თქვენ სულს შეხებია.
ყველაზე დაუცველებს, ყველაზე ერთგულებს, ბედისგან დაჩაგრულებს სწორედ ახლა სჭირდებათ ჩვენი დაცვა…” – წერენ აქციის ორგანიზატორები.
ბოლო ერთი კვირის განმავლობაში საქართველოში მიუსაფარ ცხოველთა უფლებების დასაცავად რამდენიმე აქცია გაიმართა.
მიზეზი არის ის, რომ მოქალაქეების თქმით ქვეყნის მასშტაბით, სხვადასხვა ქალაქიდან სპეციალურმა სამსახურმა მიუსაფარი ცხოველები ქუჩიდან აიყვანა და შემდგომ ეს ცხოველები “გაქრნენ”.
მიუსაფარ ცხოველთა უფლებების დამცველთა თქმით, დაჭერილ ცხოველებს, ან აღარ აბრუნებენ ქუჩაში ან უკაცრიელ ადგილებში აბრუნებენ.
ასევე გავრცელდა ინფორმაცია გორის თავშესაფრის შესახებ [ამ თავშესაფარში აქვთ კრემატორიუმი], თითქოს ამ კრემატორიუმში მიუსაფარი ცხოველების კრემაცია მოხდა. თუმცა ეს ინფორმაცია კატეგორიულად უარყო სურსათის უვნებლობის სამსახურმა.
დღეს აქციის გამართვა დაანონსებულია თბილისშიც, მთავრობის ადმინისტრაციასთან.
ამავე თემაზე:
ტოვებენ ხრიოკ ადგილას, რომელსაც „სიკვდილის გზას“ ვეძახით – რას ითხოვენ ცხოველთადამცველები
