დღეს, 4 თებერვალს, თბილისის სახელმწიფო უნივერსიტეტის სენატმა, „ქართული ოცნების“ ხელისუფლების გადაწყვეტილებაზე იმსჯელა, რომელიც ითვალისწინებს თსუ-სა და საქართველოს ტექნიკური უნივერსიტეტის გაერთიანებას.
როგორც სენატის ერთ-ერთი წევრი თეა ქარჩავა „ბათუმელებთან“ ამბობს, სენატმა მიიღო ოფიციალური განცხადება, რომლითაც უარყოფითად შეაფასა გადაწყვეტილება ორი უნივერსიტეტის გაერთიანების შესახებ და მოითხოვა ამ გადაწყვეტილების აღსრულების პროცესის შეწყვეტა.
მომხრე – ყველა, მოწინააღმდეგე – 0, თავი შეიკავა – 0.
„თსუ-ს სენატმა მკაფიოდ თქვა, რომ ის არ ეთანხმება უხეშად თავსმოხვეულ ე.წ. რეფორმას და არ იღებს მას,“ – უთხრა თეა ქარჩავამ “ბათუმელებს”.
“ქართული ოცნების“ განათლების მინისტრის მოადგილემ, ზვიად გაბისონიამ გუშინ, 3 თებერვალს განაცხადა, რომ გადაწყვეტილება თბილისის სახელმწიფო და საქართველოს ტექნიკური უნივერსიტეტების რეორგანიზაციის შესახებ უკვე მიღებულია.
მისი თქმით, პოლიტიკური გადაწყვეტილებება არ გადაიხედება, რადგან „გადაწყვეტილება უკვე მიღებულია რეორგანიზაციასთან დაკავშირებით“.
თსუ-ში კი აცხადებენ, რომ ისინი გააგრძელებენ ბრძოლას ორი უნივერსიტეტის გაერთიანების გადაწყვეტილების წინააღმდეგ.
_____________________
ამ თემაზე:
