ბათუმის საზღვაო აკადემიის კუთვნილ საწვრთნელ გემ “კადეტს” სახელი გადაარქვეს და ბათუმის საზღვაო ნავსადგურის კაპიტნის, თენგიზ გადილიას სახელი მიანიჭეს.
„გემი „CAPTAIN TENGIZ GADILIA“ მომავალ თაობებს შეახსენებს პროფესიონალიზმის, პასუხისმგებლობისა და ქართული საზღვაო ტრადიციების ერთგულების მნიშვნელობას.
აღნიშნული გადაწყვეტილება ეფუძნება თენგიზ გადილიას მრავალწლიან ნაყოფიერ საქმიანობას საზღვაო სფეროში, მის განსაკუთრებულ წვლილს ქართული საზღვაო საქმის განვითარებაში, აგრეთვე საზღვაო განათლებისა და ახალგაზრდა მეზღვაურთა პროფესიული მომზადების საქმეში შეტანილ მნიშვნელოვან დამსახურებას, და წარმოადგენს მისი ხსოვნის ღირსეულ უკვდავყოფას,“ – ნათქვამია საზღვაო ტრანსპორტის სააგენტოსა და ბათუმის საზღვაო აკადემიის ერთობლივ განცხადებაში.
თენგიზ გადილია მეზღვაური, შორეული ნაოსნობის კაპიტანი იყო.
თენგიზ გადილიამ მეზღვაურობა 1971 წელს, საქართველოს საზღვაო სანაოსნოს გემებზე დაიწყო როგორც შტურმანმა. 1985 წელს გახდა შორეული ნაოსნობის კაპიტანი.
2012 წელს გახდა ბათუმის საზღვაო ნავსადგურის კაპიტანი და გარდაცვალებამდე ამ თანამდებობას იკავებდა.
თენგიზ გადილია 2026 წლის იანვარში გარდაიცვალა.
