Batumelebi | დამეწყრილი ოჯახი დახმარებას ითხოვს დამეწყრილი ოჯახი დახმარებას ითხოვს – Batumelebi
RU | GE  

დამეწყრილი ოჯახი დახმარებას ითხოვს

ხელვაჩაურის მუნიციპალიტეტის სოფელ გვარაში ფუტკარაძეების ოჯახი მთავრობისგან დახმარებას ითხოვს.  „დადგინდეს უსაფრთხოა თუ არა ჩვენი საცხოვრებელი ადგილი და სახლი,” – ამბობს ნოდარ ფუტკარაძე.  ფუტკარაძეების საცხოვრებელ სახლთან მეწყერი ორი კვირის წინ ჩამოწვა. ოჯახი შიშობს, რომ წვიმიან ამინდში მეწყერი შესაძლოა განმეორდეს და საცხოვრებელ სახლს საფრთხე შეუქმნას.

ნოდარ ფუტკარაძე ამბობს, რომ მეწყერთან დაკავშირებულ საფრთხეზე  ხელვაჩაურის მუნიციპალიტეტის გამგებელს, ნადიმ ვარშანიძეს პირადად ესაუბრა და გამგეობას განცხადებითაც მიმართა:
„გამგებელი შეგვპირდა, რომ გეოლოგები შეისწავლიან ჩვენი საცხოვრებელი ადგილის მდგომარეობას, თუმცა ამ დრომდე არავინ გამოჩენილა“

„ბათუმელები“ ხელვაჩაურის გამგების პრესსამსახურს დაუკავშირდა. პრესსამსახურის ინფორმაციით ფუტკარაძების სახლთან დაკავშირებით გამგეობა დაუკავშირდა აჭარის გარემოს დაცვის სამმართველოს და სპეციალისტები ადგილზე არსებულ მდგომარეობას ამ კვირის განმავლობაში შეისწავლიან. რაც შეეხება გაწმენდით სამუშაოებს, გამგეობაში გვითხრეს, რომ სამუშაოები დაწყებულია და გაგრძელდება.

ნოდარ ფუტკარაძის ინფორმაციით, საგზაო დეპარტამენტის თანამშრომლები ფუტკარაძეების სახლთან უკვე იმყოფებოდნენ, გაწმენდითი სამუშაოებიც დაიწყეს, თუმცა ბოლომდე არ მიუყვანიათ, ამის მიზეზად კი წვიმიანი ამინდები დაასახელეს.

გამგეობის პრესსამსახურის ინფორმაციით, უამინდობასთან დაკავშირებით, ხელვაჩაურის მუნიციპალიტეტში სტიქიის შედეგების სალიკვიდაციო შტაბი 24 – საათიან რეჟიმში მუშაობს.
ცხელი ხაზი: 0 800 – 100 – 106. 25 93 17; 599 85 15 75; 591 98 32 61; 595 95 87 08;
ამ დროისთვის არსებული ინფორმაციით ხელვაჩაურში მეწყერის 3 კერა დაფიქირდა.
14963537_533583860172720_940380550_o

ხელვაჩაურის მუნიციპალიტეტი, სოფელი გვარა.

ხელვაჩაურის მუნიციპალიტეტი, სოფელი გვარა.

ნეტგაზეთის მასალების სხვა გამოცემებში გადაბეჭდვის წესი
ავტორი