მთავრობის აპარატში ჯაბა ფუტკარაძეს თანამდებობა შეუქმნეს, ის რიჟვაძის ფინანსთა მინისტრი იყო

აჭარის ფინანსთა და ეკონომიკის ყოფილი მინისტრი, ჯაბა ფუტკარაძე, აჭარის არალეგიტიმური მთავრობის ადმინისტრაციაში დაასაქმეს.

ფინანსთა და ეკონომიკის ყოფილი მინისტრი არალეგიტიმური მთავრობის აპარატის უფროსის მოადგილის პოსტზე დანიშნეს.

ინფორმაცია „ბათუმელებს“ უწყების პრესსამსახურში დაუდასტურეს.

აჭარის მთავრობის აპარატში უფროსის მოადგილის პოსტი აქამდე არ არსებობდა.

მიმდინარე წლის 27 მაისს, აჭარის არალეგიტიმური მთავრობის თავმჯდომარის, სულხან თამაზაშვილის მიერ გამოცემული დადგენილებით, მთავრობის აპარატის დებულებაში ცვლილება შევიდა, რითაც დამტკიცდა აპარატის უფროსის მოადგილის შტატი. სწორედ ეს თანამდებობა დაიკავა ყოფილმა მინისტრმა. 

ჯაბა ფუტკარაძე აჭარის ფინანსთა და ეკონომიკის მინისტრად, 2018 წელს დაინიშნა.

ფუტკარაძემ პოსტი სამი თვით მას შემდეგაც შეინარჩუნა, რაც ყოფილმა თავმჯდომარემ, თორნიკე რიჟვაძემ თანამდებობა დატოვა.

30 ივნისს კი ცნობილი გახდა, რომ ჯაბა ფუტკარაძე ფინანსთა და ეკონომიკის მინისტრის პოსტზე ედნარ ნატარიძემ ჩაანაცვლა.

ჯაბა ფუტკარაძე ერთ-ერთი იყო იმ ყოფილ მაღალჩინოსნებს შორის, ვინც თორნიკე რიჟვაძის დაჭრის შემდეგ თბილისში, საავადმყოფოში ჩავიდა მის მოსანახულებლად.

„გასროლა და გადარჩენილი თორნიკე რიჟვაძე არ აწყობდათ, კობახიძეს სახეზე ეწერა ეს“ – ინტერვიუ