2022 შევსებული ქონებრივი დეკლარაციის მიხედვით, აჭარის ფინანსთა და ეკონომიკის მინისტრს, არც საცხოვრებელი ბინა აქვს, არც აგარაკი, არც მიწის ნაკვეთი და არც ავტომანქანა. მის დეკლარაციაში არაფერი წერია საცხოვრებლის დაქირავების შესახებ, ასეთ შემთხვევაში ჯაბა ფუტკარაძე ვალდებული იყო ქონებრივ დეკლარაციაში აესახა წლის განმავლობაში ქირის სახით გადახდილი თანხის ოდენობა.
მინისტრი ასევე ვალდებული იყო ქონებრივ დეკლარაციაში აესახა ინფორმაცია იმის შესახებ, თუ მას საცხოვრებელი უსასყიდლოდ დაუთმეს, რადგან ასეთი შეთავაზება შეიძლება ძვირადღირებულ საჩუქრად ჩაითვალოს. საჩუქარი კი დეკლარაციაში აუცილებლად უნდა აისახოს.
მინისტრის ქონებრივი დეკლარაციის მიხედვით, არანაირ უძრავ ქონებას არ ფლობს არც მისი მეუღლე.
ჯაბა ფუტკარაძემ, როგორც აჭარის ფინანსთა და ეკონომიკის მინისტრმა, პირველი დეკლარაცია 2018 წელს შეავსო. ბათუმში ბინა მას არც იმ დროს ჰქონდა. ამ დეკლარაციაში მინისტრმა ჩაწერა, რომ ფლობდა ბინას [84.6კვ.მ] თბილისში, ბურძგლას ქუჩაზე. იგივე დეკლარაციის მიხედვით, 2015 წელს ამ ბინის შესაძენად 47 000 დოლარი გადაუხდია.
2018 წელს შევსებულ დეკლარაციაში ჯაბა ფუტკარაძემ იპოთეკური სესხის შესახებაც მიუთითა – 50 000 დოლარის ოდენობით და 2017- 2027 წლამდე ვადით. 2018 -2020 წელს შევსებული დეკლარაციების მიხედვით, მინისტრი ამ სესხის მომსახურებაში, ყოველ წელს, 6000-ზე მეტ დოლარს იხდიდა. 2021-2022 წლებში სესხის მომსახურების გაგრძელების ან მისი გადაფარვის შესახებ ინფორმაცია არ იძებნება.
ჯაბა ფუტკარაძე მეუღლესთან და შვილთან ერთად 2015 წლამდე მამის, ზაურ ფუტკარაძის სახლში ცხოვრობდა. ამის შესახებ თავის ქონებრივ დეკლარაციაში თავად ზაურ ფუტკარაძემ ჩაწერა [ის ამ დროს სოფლის მეურნეობის მინისტრი იყო]. 2016 წელს შევსებული დეკლარაციის მიხედვით ჯაბა ფუტკარაძე მასთან აღარ ცხოვრობდა.
2018 წელს აჭარის მთავრობის თავმჯდომარემ, თორნიკე რიჟვაძემ ჯაბა ფუტკარაძე მინისტრად დანიშნა.
2022 წელს შევსებულ დეკლარაციაში ჯაბა ფუტკარაძე წერს, რომ დანაზოგის სახით ფლობს ბინის რეალიზაციიდან მიღებული თანხის – 46 000 დოლარს. სავარაუდოდ მინისტრმა თბილისში მის საკუთრებაში არსებული ბინა გაყიდა, რადგან სხვა ბინა მის ქონებრივ დეკლარაციებში არ იძებნებოდა.
2022 წელს შევსებული ქონებრივი დეკლარაციის მიხედვით, მინისტრი და მისი მეუღლე არ ფლობენ მნიშვნელოვან დანაზოგს, არ მიუღიათ ძვირადღირებული საჩუქრები, არ მოგზაურობენ უცხოეთში, არ ფლობენ ავტომანქანებს.
რაც შეეხება ავტომანქანას, 2018 წლის შევსებული დეკლარაციის მიხედვით, ჯაბა ფუტკარაძე ფლობდა 2017 წელს 5000 დოლარად შეძენილ Toyota Prius-ს. ეს მანქანა მას 2020 წელს 4700 დოლარად გაუყიდია, ამის შემდეგ მას ახალი მანქანა არ შეუძენია.
საჯარო სამსახურის ბიურო ყოველი წლის პირველ ნახევარში აქვეყნებს იმ პირთა სიას, რომელთა ქონებრივი დეკლარაციების მონიტორინგსაც გეგმავს. იმ შემთხვევაში, თუ ბიურო დაადგენს, რომ თანამდებობის პირი დეკლარაციას არაკეთილსინდისიერად ავსებს, რაც უმეტესწილად იმის ნიშანია, რომ ეს პირი ქონებას მალავს, მას დააჯარიმებენ.
აჭარის ფინანსთა და ეკონომიკის მინისტრი 2023 წელს შესამოწმებელ პირთა სიაშია. რას გამოავლენს საჯარო სამსახურის ბიურო, დამალა თუ არა მინისტრმა ქონებრივი მდგომარეობის შესახებ რეალური ინფორმაცია, ამას სწორედ ბიუროს ანგარიშიდან გავიგებთ.
წელს მინისტრს ქონებრივი დეკლარაცია ჯერ არ შეუვსია.
სწორედ გამჭვირვალობის აუცლებლობის მოტივით ხნიდნენ საქართველოში რუსული კანონის მიღების აუცილებლობას უცხოელი გავლენის აგენტების გამჭვირვალობის შესახებ. მსგავსი კანონი რუსეთში 2012 წლიდან სწორედ სამოქალაქო ორგანიზაციებისა და მედიის რეპრესიებისა და საბოლოოდ, ქვეყნიდან გასაძევებლად გამოიყენეს. ეს პროექტი საზოგადოების პროტესტის შემდეგ ჩავარდა.
