„სისტემამ მოკლა ონისეს მამა, სრულიად ჯანმრთელი ადამიანი. ნერვიულობისგან საკუთარი სახლის ჭიშკართან დაარტყა და ჩაიკეცა,“ – სინდისის პატიმარი რეზო კიკნაძე ტელეკომპანია „პირველს“ ციხიდან ტელეფონით ჩაერთო და ონისე ცხადაძის მამის გარდაცვალების შესახებ ისაუბრა.
„არ მყავდა ნანახი, მაგრამ ონისე იმდენ რამეს გვიყვებოდა, უნახავად ვიცნობდით.
ტიპური იმერელი, უთბილესი, უსაყვარლესი, უმაღლესი იუმორის მქონე, შვილებზე გიჟურად შეყვარებული ადამიანი. მარტო მამაშვილური კი არა, ძმაკაცური ურთიერთობა რომ ჰქონდათ. დედასთან ყოველი დარეკვისას მაშინვე რომ წაართმევდა ხოლმე ტელეფონს და იქიდან ამხნევებდა შვილს, როგორც შეეძლო.
ვერ წარმოიდგენთ, როგორი დარტყმა იყო. იმ დღეს ჩვენც მოვკვდით, გავტყდით, ერთი ვაი-ვიში გვქონდა, მაგრამ გათენდა მეორე დღე და ახლიდან გავცოცხლდით…. ახლა აღარაფერი გვაქვს. წარმოიდგინეთ, რას გიზამთ ყველას, ვისაც წვლილი მიგიძღვით ამაში.
ჩვენ თუ გვკლავთ, მოგვკალით, მშობლებს რაღას ერჩით, თან რისთვის? აქციაზე დაჭერილებიდან უკვე მესამეს მოუკვდა მშობელი ამ რამდენიმე თვეში. გასკდა გული, აღარ დაგვრჩა ადგილი, სადაც არ დავჭრილვართ.
აწი მართლა გეშინოდეთ ჩვენი. უსირცხვილო მოსამართლე კი დარბაზიდან გაძევებით გვემუქრება, თავისი ეგო რომ დაიკმაყოფილოს და მშობლების ნახვის ერთ-ერთ წყაროსაც გვიკეტავს“, – თქვა რეზო კიკნაძემ სატელეფონო ზარისას, რომელსაც „ტვ პირველი“ ავრცელებს.
სინდისის პატიმრის, ონისე ცხადაძის მამა, გუშინ, 26 ივნისს იმ დროს გარდაიცვალა, როდესაც თბილისის საქალაქო სასამართლოში ონისე ცხადაძის და კიდევ სხვა 10 პოლიტპატიმრის [ანდრო ჭიჭინაძე, ირაკლი ქერაშვილი, გიორგი ტერიშვილი, სერგი კუხარჩუკი, რუსლან სივაკოვი, ჯანო არჩაია, გურამ მირცხულავა, ვალერი თეთრაშვილი და რევაზ კიკნაძე] სასამართლო პროცესი მიმდინარეობდა.
