ბათუმის ბულვარის დირექტორისა და მისი მოადგილეების დასანიშნად ამიერიდან კონკურსს აღარ გამოაცხადებენ. ამ თანამდებობებზე დასანიშნად დღემდე მოქმედი წესით კონკურსები უნდა გამოცხადებულიყო, თუმცა, ეს წესი აჭარის არალეგიტიმურმა მთავრობამ გააუქმა.
შესაბამის დადგენილებას აჭარის არალეგიტიმური მთავრობის თავმჯდომარე სულხან თამაზაშვილმა ხელი 2025 წლის 13 მაისს მოაწერა. დადგენილება 19 მაისიდან ამოქმედდა.
სსიპ „ბათუმის ბულვარის“ დირექტორი 2022 წლის ივნისიდან დღემდე ლაშა მიქელაძეა. მას სამი მოადგილე ჰყავს.
2025 წლის 13 მაისის დადგენილებით ცვლილება შევიდა ბულვარის დებულებაში. ამ ცვლილებამდე დებულებაში ეწერა რომ:
„ბულვარს ხელმძღვანელობს ბულვარის დირექტორი, რომელსაც თანამდებობაზე ნიშნავს მთავრობა, ხოლო თანამდებობიდან ათავისუფლებს მთავრობა მინისტრის წარდგინებით ან საკუთარი ინიციატივით. ბულვარის დირექტორის თანამდებობაზე დასანიშნი კანდიდატურის შესარჩევად სამინისტრო აცხადებს გამარტივებულ საჯარო კონკურსს და კონკურსის საფუძველზე შერჩეულ კანდიდატურას წარუდგენს დასანიშნად მთავრობას“.
ახალი ცვლილებით კი:
„ბულვარს ხელმძღვანელობს დირექტორი, რომელსაც თანამდებობაზე ნიშნავს და თანამდებობიდან ათავისუფლებს მთავრობა, აჭარის ავტონომიური რესპუბლიკის ფინანსთა და ეკონომიკის მინისტრის [შემდგომში მინისტრი] წარდგინებით ან საკუთარი ინიციატივით, კანონმდებლობით დადგენილი წესით.“
რაც შეეხება მოადგილეებს – ცვლილებამდე დებულებაში ეწერა:
- „ბულვარის დირექტორს ჰყავს სამი მოადგილე, მათ შორის ერთი პირველი მოადგილე, რომლებსაც სამინისტროს მიერ ჩატარებული გამარტივებული საჯარო კონკურსის საფუძველზე, თანამდებობაზე ნიშნავს მინისტრი, ხოლო თანამდებობიდან ათავისუფლებს მინისტრი, ბულვარის დირექტორის წარდგინებით ან საკუთარი ინიციატივით.“
ახალი დებულების მიხედვით კი:
- „ბულვარის დირექტორს ჰყავს სამი მოადგილე, მათ შორის ერთი პირველი მოადგილე. ბულვარის დირექტორის მოადგილეებს თანამდებობაზე ნიშნავს და თანამდებობიდან ათავისუფლებს მინისტრი, ბულვარის დირექტორის წარდგინებით ან საკუთარი ინიციატივით, კანონმდებლობით დადგენილი წესით.“.
ბულვარის მოქმედი დირექტორი ლაშა მიქელაძე ჯერ პირველ მოადგილედ დაინიშნა და დირექტორის მოვალეობას ასრულებდა, ვინაიდან მისი წინამორბედი ირაკლი ჯინჭარაძე თვლიდა, რომ უკანონოდ გაათავისუფლეს და სასამართლოში დავობდა.
ამ თემაზე:
ლაშა მიქელაძეს ბათუმის ბულვარში დირექტორის პირველ მოადგილედ ნიშნავენ
