თურქეთის სხვადასხვა ოფიციალური უწყების, მათ შორის, ორდუს სახელმწიფო პროკურატურის დოკუმენტების მიხედვით დგინდება, რომ საქართველოდან გაძევების შემთხვევაში, „ბათუმელ მედროშეს“ თურქეთში დაპატიმრება ელის. „ბათუმელებს“ აღნიშნული დოკუმენტები ინფორმირებულმა პირმა მოაწოდა. უფლებადამცველის შეფასებით, ეს დოკუმენტები ახალაღმოჩენილი გარემოებაა და ამის საფუძველზე ხელახლა მიმართავენ ქართულ სასამართლოებს მედროშისთვის ლტოლვილის სტატუსი მინიჭების მოთხოვნით.
დოკუმენტების თანახმად, რომელიც „ბათუმელებს“ მოაწოდეს, თურქეთის ოფიციალური სამსახურები ამტკიცებენ, რომ თემურ ქათამაძე [გაფფარ ილმაზი] ტერორისტულ ორგანიზაცია FETO-სთან დაკავშირებული პირია. ამავე დოკუმენტების მიხედვით, თემურ ქათამაძის მიერ საქართველოში დაფუძნებული კომპანია „გიულენის ტერორისტულ მოძრაობასთან“ არის კავშირში.
თემურ ქათამაძე ქართველი მუჰაჯირების შთამომავალია, თურქეთის მოქალაქე და საქართველოს მოქალაქეობას წლებია უშედეგოდ ითხოვს. თემურ ქათამაძე მას შემდეგ დააკავეს, რაც ბათუმის პროევროპული აქციების აქტიური მონაწილე გახდა. ის აქციებზე საქართველოს დროშით ხელში ჩნდებოდა. თემურ ქათამაძე ამჟამად შსს-ს მიგრაციის დროებითი განთავსების იზოლატორშია და ქვეყნიდან გაძევება ემუქრება.
თემურ ქათამაძეს ლტოლვილის, ან ჰუმანიტარული სტატუსის მინიჭებაზე საბოლოოდ სასამართლომაც უარი უთხრა ბათუმელს მედროშეს, თემურ ქათამაძეს [გაფფარ ილმაზს]. მედროშის ქვეყნიდან გაძევების პროცედურა შსს-მ დაიწყო, თუმცა გაძევების შესახებ გადაწყვეტილებაც გასაჩივრდა და შსს ისევ სასამართლოს გადაწყვეტილებას უნდა დაელოდოს.
საკუთარი თავის შესახებ ამ დრომდე თემურ ქათამაძემ ამ დოკუმენტების მოპოვება თავად ვერ შეძლო, რადგან მის თურქულ პასპორტს ვადა გაუვიდა, პირადობის მოწმობის საფუძველზე კი, ინფორმაციის მიწოდებაზე თურქეთიდან უარი უთხრეს.
უფლებადამცველ თამთა მიქელაძეს შეფასებით, „ბათუმელების“ ხელთ არსებული დოკუმენტები ადასტურებს იმ ეჭვს, რასაც ამ დრომდე აჟღერებდა „ბათუმელი მედროშე“, რომ ის თურქეთში დაბრუნების შემთხვევაში პოლიტიკური დევნის ობიექტი გახდება.
„ეს არის ახლადაღმოჩენილი გარემოება. ჩვენ ამ დოკუმენტებს დავურთავთ სააპელაციო საჩივარს… ასევე, შესაძლებელია ლტოლვილის და ჰუმანიტარული სტატუსის ხელახლა მოთხოვნა“, – ამბობს თამთა მიქელაძე, „სოციალური სამართლიანობის ცენტრის“ ხელმძღვანელი. ეს ორგანიზაცია საიასთან ერთად თემურ ქათამაძის ინტერესებს იცავს.
„ეს დოკუმენტები ადასტურებს იმ ეჭვს, რომ თურქეთში თემურ ქათამაძის წინააღმდეგ გამოძიების საფუძველი შეიძლება იყოს მისი კავშირები ფეტულა გიულენის მოძრაობასთან, რომლის წევრიც იგი არასდროს ყოფილა. მას ჰქონდა ახლო კავშირები ამ მოძრაობის წევრებთან საქართველოში.
აქამდე ამ ფაქტს დადგენილად არ მიიჩნევდა შსს-ს მიგრაციის სამსახური. შესაბამისად, სასამართლოსაც ამ საკითხზე არსებითად არ უმსჯელია საქმის განხილვის დროს. ამ ოფიციალური დოკუმენტებით კი დასტურდება, რომ ბატონი თემური თურქეთში მისი დეპორტაციის შემთხვევაში უფლების დარღვევის მსხვერპლი გახდება. არაერთი ანგარიში საუბრობს გიულენის მოძრაობის წევრების მიმართ სასტიკ და არაადამიანურ მოპყრობაზე, სამართლიანი სასამართლოს უფლების დარღვევაზე, პოლიტიკურ დევნაზე თურქეთში.
თემურ ქათამაძეს დეპორტაციას ისე გეგმავდნენ, რომ არ შეუფასებია სახელმწიფოს: რა ტიპის გამოძიება მიმდინარეობდა, რა სამართლებრივი რისკები არსებობდა მის წინააღმდეგ?
გარემოებები, რაზეც საუბარია ამ დოკუმენტებში, არ ნიშნავს იმას, რომ ეს დადასტურდება. თემურ ქათამაძე გამორიცხავს ამ კავშირებს,“ – გვითხრა თამთა მიქელაძემ.
თუ სააპელაციო სასამართლო თემურ ქათამაძეს [გაფფარ ილმაზის] გაძევების პროცესს არ შეაჩერებს და შემდეგ შსს-ს მიგრაციის სამსახური უკვე ახლადაღმოჩენილი გარემოებების საფუძველზე ისევ უარს ეტყვის მედროშეს სტატუსის მინიჭებაზე, „სოციალური სამართლიანობის ცენტრი“ აპირებს „თემურ ქათამაძის საქმე“ სტრასბურგის სასამართლოში გაასაჩივროს.
- რა ხდება?
იმის გამო, რომ საქართველოდან პროევროპული პროტესტის გამო აძევებენ და ლტოლვილის სტატუსიც კი არ მიანიჭეს, თემურ ქათამაძე [გაფფარ ილმაზი] პროტესტის ნიშნად 48 დღე შიმშილობდა.
თემურ ქათამაძე 2025 წლის 11 იანვრის აქციაზე ადმინისტრაციული წესით დააკავეს, შემდეგ კი შსს-მ მისი საქართველოდან გაძევება მოითხოვა.
დაკავების დროს, როგორც თემურ ქათამაძე ამბობს, მასზე ფიზიკურად იძალადა ბათუმის პოლიციის უფროსმა ირაკლი დგებუაძემ.
ამ თემაზე:
3 პირს, მათ შორის რუსეთის მოქალაქეს, ლტოლვილის სტატუსი მიანიჭეს – მედროშეს აძევებენ
