ბათუმის მერის მოვალეობის შემსრულებლად გიორგი მურვანიძე დანიშნეს. ახალი მმშ ბათუმის მერიაში დღეს, 14 მაისს, აჭარის არალეგიტიმური მთავრობის თავმჯდომარემ, სულხან თამაზაშვილმა მიიყვანა.
ოფიციალურ წარდგენას ესწრებოდა ბათუმის არჩეული და უკვე ყოფილი მერი არჩილ ჩიქოვანიც.
გიორგი მურვანიძე აქამდე ლევან სამხარაულის სახელობის სასამართლო ექსპერტიზის ეროვნული ბიუროს უფროსის მოადგილის თანამდებობაზე მუშაობდა.
2004-2005 წლებში იყო ბათუმის რაიონული პროკურატურის გამომძიებელი, ხოლო 2005-2006 წლებში აჭარის პროკურატურის საგამოძიებო ნაწილის უფროსი გამომძიებელი.
ოფიციალური რელიზის თანახმად, აჭარის არალეგიტიმური მთავრობის თავმჯდომარემ, სულხან თამაზაშვილმა „არჩილ ჩიქოვანს მადლობა გადაუხადა გაწეული სამუშაოსთვის და გიორგი მურვანიძეს ახალ პოზიციაზე წარმატებები უსურვა“.
მერის მოვალეობის შემსრულებლის წარდგენა ბათუმის მერიაში
საჯაროდ გავრცელებული ფოტოების მიხედვით, მერის მოვალეობის შემსრულებლის წარდგენას ბათუმის საკრებულოდან არავინ ესწრებოდა.
თვითმმართველობის კოდექსის თანახმად, საკრებულოს მერიის მაკონტროლებლის ფუნქცია აქვს. ბათუმის რეალობაში კი კანონით საკრებულოსთვის განსაზღვრული ფუნქცია აჭარის არალეგიტიმურ მთავრობას აქვს აღებული.
არჩილ ჩიქოვანი, როგორც არჩეული მერი, ვალდებული იყო ახალი ვიცე-მერი თავად წარედგინა მინიმუმ მერიის თანამშრომლებისთვის, მით უფრო, თუ მას თანამდებობიდან წასვლა გადაწყვეტილი ჰქონდა.
მერი ასევე ანგარიშვალდებული იყო ბათუმის მოსახლეობასთან, ხალხთან, ვინც გადასახადებს იხდის და ამ გადასახადებით ბათუმის ბიუჯეტი ივსება.
გუშინ, 13 მაისს, არჩილ ჩიქოვანმა ფეისბუქზე დაწერა, რომ გადადგა.
