„ფაქტობრივად აღიარება გვაქვს მიღებული“, – ამბობს მზია ამაღლობელის ერთ-ერთი ადვოკატი, საიას იურისტი ჯუბა ქათამაძე ირაკლი დგებუაძის 8 მაისს სასამართლოსთვის მიცემული ჩვენების შესახებ.
დაკითხვის დროს ადვოკატებმა ირაკლი დგებუაძეს მზია ამაღლობელის დაკავების დროს გადაღებული ერთ-ერთი ვიდეო კადრის შესახებ ჰკითხეს, სადაც ირაკლი დგებუაძის ხმა ისმის: ბათუმის პოლიციის უფროსი მზია ამაღლობელს ემუქრება და აგინებს.
„სისხლით… ბო*იშვილი ვიყო, სისხლით დავიჭერ… ამას მოვუ**ნავ დედის მუ*ელს,“ – ისმის ვიდეო ჩანაწერში ირაკლი დგებუაძის ხმა.
„მან [ირაკლი დგებუაძემ] თქვა, რომ კი, ეს ხმა, ეს გინება და მუქარა ჰგავს ჩემს ხმასო… ფაქტობრივად აღიარა ამ ადამიანმა. როდესაც ქალაქის პოლიციის უფროსი ემუქრება დაკავებულ პირს, რომ მას სისხლით დაიჭერს, აგინებს და თავის თავზე იგინებს, რომ ამას სისხლით დავიჭერო, ამაზე მეტი მუქარა რა შეიძლება იყოს?!
ფაქტობრივად აღიარება გვაქვს მიღებული, თუმცა ამას შესაბამისი ორგანოებისგან რეაგირება ჯერჯერობით არ მოჰყვება. არ ახდენს სპეციალური საგამოძიებო სამსახური რეაგირებას,“ – გვითხრა ჯუბა ქათამაძემ.
იურისტი ირაკლი დგებუაძის მხრიდან სავარაუდოდ ჩადენილ კიდევ ერთი დანაშაულის შესახებ საუბრობს.
სპეციალურ საგამოძიებო სამსახურს, რომელიც პოლიციელების მიერ ჩადენილ სავარაუდო დანაშაულებს უნდა იძიებდეს, ამ დრომდე არ გამოუძიებია ირაკლი დგებუაძის მიერ ჩადენილი არაადამიანური მოპყრობის სავარაუდო შემთხვევა, რაზეც მზია ამაღლობელმა განაცხადა. უკანონოდ დაკავებული ჟურნალისტის თქმით, მას ირაკლი დგებუაძემ სახეში შეაფურთხა.
ირაკლი დგებუაძეს 2025 წლის 11 იანვრის აქციაზე დაკავებული სხვა პირებიც – მალხაზ ირემაძე და თემურ ქათამაძე ადანაშაულებენ ძალადობაში. ირაკლი დგებუაძეს ადანაშაულებდა 2023 წლის ანტირუსულ აქციაზე დაკავებული გენრი დოლიძეც, რომლის თქმითაც, ირაკლი დგებუაძემ მას სახეში ჩაარტყა ფეხი.
არცერთი ეს შემთხვევა სპეციალურ საგამოძიებო სამსახურს არ გამოუძიებია.
მზია ამაღლობელის დაკავებიდან მალევე ორმა ორგანიზაციამ, ახალგაზრდა იურისტთა ასოციაციამ და ჟურნალისტური ეთიკის ქარტიამ, მოითხოვა ირაკლი დგებუაძისთვის უფლებამოსილების შეჩერება და სპეციალურ საგამოძიებო სამსახურს მიმართეს, თუმცა ირაკლი დგებუაძე ისევ ბათუმის პოლიციის უფროსია. სამსახურებრივი უფლებამოსილების შეჩერება საჭიროა მიუკერძოებელი გამოძიებისთვის.
- რა ხდება?
მზია ამაღლობელი, გამოცემა „ბათუმელების“ და „ნეტგაზეთის“ დამფუძნებელი და დირექტორია. იგი 2025 წლის 11-12 იანვარს ორჯერ დააკავეს აქციაზე, პირველად – სტიკერის გაკვრისთვის და მეორედ ბათუმის პოლიციის უფროსისთვის, ირაკლი დგებუაძისთვის სილის გაწვნისთვის.
მზია ამაღლობელი უკანონო პატიმრობაშია და პროტესტის ნიშნად 38 დღე შიმშილობდა. მზია ამაღლობელი რომ ჟურნალისტური საქმიანობის გამო ისჯება, ამას რამდენიმე გარემოება ნათლად აჩვენებს, მაგალითად, გაყალბებული ოქმი, რომლის საფუძველზეც მზია ამაღლობელს პატიმრობა შეუფარდეს.
უფლებადამცველების და კვალიფიციური იურისტების შეფასებით, მზია ამაღლობელი უკანონო პატიმარია, რადგან ბრალდება უკანონოა და სილის გაწვნა არათუ თავდასხმა არ არის, არამედ საერთოდ არ არის სისხლის სამართლის დანაშაული.
მზია ამაღლობელს პოლიციელზე თავდასხმას ედავებიან. ბრალის დადასტურების შემთხვევაში მას 4-დან 7 წლამდე თავისუფლების აღკვეთა ემუქრება.
მზია ამაღლობელის ინტერესებს იცავენ „ახალგაზრდა იურისტთა ასოციაცია“, იურიდიული ფირმა BLB და მისი უფროსი პარტნიორი, მაია მწარიაშვილი; ადვოკატები – რაჟდენ ხიმშიაშვილი და კახა წერეთელი.
ამ თემაზე:
„მე განვიცადე ტკივილი“ – ბათუმის პოლიციის უფროსი ქალის გაწნულ სილაზე
